Uzibona enesinyama esibi umdlali ‘oxoshwa njalo’
UXola Mlambo ukhala ngamashwa amlandelayo emsebenzini awuthandayo webhola.
Uthi uhamba ngendlela engaqondakali emaqenjini asuke ewadlalela okumenza asole ukuthi kukhona okungahambi kahle.
“Ngaqala ukubona kwiBidvest Wits ukuthi kukhona okungalungile emsamo wami njengoba umqeqeshi uGavin Hunt wayengasangidlalisi.
“Ngaphinda ngachithwa yi-Orlando Pirates ngisathanda ukudlala kuyona,” kusho lo mdlali.
“Kodwa kwagcina kubheda impela ngaphinda ngathola ithuba kuMaZulu FC kodwa ngahamba sengichithwa nakhona.”
UMlambo ungomunye wabadlali abashiya abalandeli bekhala ngesikhathi ehamba kwiPirates ngoba babemthanda, bekholwa wukuthi kusekuningi angakwenzela iqembu.
Nokho kuyacaca ukuthi lento yinto ebhekene naye ngoba uxoshwe naseqenjini eliphethwe ngumuntu owayeyimenenja yakhe.
“Ngafika kwiTS Galaxy imenenja yathi kimina njengoba ngisalelwe yinkontileka yeminyaka embili bazoyinqamula ngoba angikho ezinhlelweni zomqeqeshi.
“Yathi kuzomele ngifune umsebenzi kwenye indawo. Kumanje ngifuna ukubonana noTim Sukazi ngoba kimina ufana nobaba njengoba ubeyimenenja yami.
“Umqeqeshi uSead Ramovic ubekhala ngokuthi ngidlala i-tennis ball mina,” kuchaza lo mdlali oneminyaka engu-32.
FUNDA NALA: UMfundo Vilakazi uveza isifiso sakhe esikhulu ngeChiefs
Akacacisanga ke nokho ukuthi kukhona yini asezamile ukukwenza ukuvika leli bhadi elilokhu limlandela.
