UDoctor ubalisa ngoKhoza, uhlonza ongaba wusihlalo wePSL
ALFRED NGUBANE
UDoctor Khumalo uzwa ubuhlungu ngokushiya kuka-Irvin Khoza ekubeni ngusihlalo we-PSL.
Kusanda kuvela izindaba zokuthi uKhoza uhlongoza ukushiya kulesi sikhundla ngenxa yokuthi usekhulile ngokweminyaka.
Le nkakha yebhola lakuleli ithi kuzoba nzima ukuthola ozovala isikhala sakhe kwazise ulisebenzele kanzima ibhola.
“Uyabona uKhoza uyawazi umsebenzi wakhe futhi kakhulu,” kusho uKhumalo.
“Unobudlelwano obuhle nabo bonke abaphathi bamaqembu emhlabeni nosomabhizinisi…”
Ngokubona kukaDoctor, bekungaba kuhle uKhoza abe nesandla ekuqokweni kozongenza esikhundleni sakhe.
“Khona ngiyavuma usemdala ngeminyaka njengoba eneminyaka engu-76 nje.
“Mina bengingafisa ukuthi kube nguye uKhoza okhomba umuntu ozongena ezicathulweni zakhe ngoba zinkulu kakhulu.
“Kudingeka ukuthi kube umuntu osehambe kakhulu kule ndima yezamabhizinisi. “Ozokwazi ukuthatha le ligi ayikhuphulele kwelinye izinga,” kuchaza uKhumalo.
Uthe ngeke kube lula ukuthola umuntu ongenza njengoKhoza ngoba ngisho kwakwiPirates kuyabonakala uma eqhelile eqenjini.
“Amagalelo ka Khoza ngiyawazi kakhulu kusukela engena ebholeni kwi-Orlando Pirates nangesikhathi eshiya kwaba muncu kuleli qembu.
“Wabuya ngo-1993 i-Orlando Pirates yanqoba iligi ngo-1994, ngo-1995 yanqoba iCaf Champions League neCaf Super Cup.
“Manje kuzomele ngempela kucoshelelwe ukuthi kuphathe umuntu onohlonze kwiPSL.
FUNDA NALA: UXoki uncoma isenzo sikaBroos ngamahlebezi okushiya
“Nakuba mina ngokwami bengingathanda uJohn Commitis ongusihlalo weCape Town City anikwe lo msebenzi ngoba unamava kanti mdala ekuphathweni kwebhola lakuleli.”
