UXoki uncoma isenzo sikaBroos ngamahlebezi okushiya
Umqeqeshi weBafana Bafana, u-Hugo Broos, ukhulule abadlali ngesikhathi ebaqinisekisa ukuthi akayi ndawo.
Lokhu kuvezwe ngomunye wabadlali abebesekhempini yeBafana uThapelo Xoki.
UBroos, obuyise isithuzi seBafana eyiqedisa endaweni yesithathu kwi-Africa Cup of Nations ka-2023, bekuke kwavela ukuthi usefuna ukuyishiya.
I-Club Brugge neqembu lesizwe laseTunisia yibona obekuvela ukuthi bayameshela kanti kuthiwe elaseTunisia eselimnqobile.
Nokho uzihlangulile yena, wathi usawuthanda lo msebenzi awenza kwiBafana futhi akayi ndawo.
“Kube yinto enkulu ukuthi aqinisekile ukuthi akahambi, ubonile indlela abebeyiyo abadlali uma bezwa lokho…,” kusho uXoki kwabe-iDiski Times.
“Kuhlale obala ukuthi leli qembu selibe ndawonye isikhathi eside futhi kunokuzwana okuhle kulo.
“Kukwenza kube lula kwabanye bethu abasanda kungena eqenjini, ukungena eqenjini, ngoba kunokuzwana okuhle.
“Kunobumbano nabadlali abaningi abazidelayo uma bedlala,” kuqhuba uXoki odlala kwi-Orlando Pirates.
“Kubalulekile ukuthi kube nguye umqeqeshi ocacisa ngakho konke okwenzekayo.
“Ukwenzile lokho, wasicacisela ngekusasa lakhe kanti manje sesibheke ngabomvu (imidlalo yokuhlungela iNdebe yoMhlaba).”
Lo mdlali wasemuva we-Orlando Pirates ubedlala okokuqala eqenjini lesizwe kwiFifa Series ebise-Algeria.
Uthe lamahlebezi abekhona ngoBroos awazange akuphazamise ukuzilungiselela kwabo imidlalo la bebebhekene khona ne-Andorra ne-Algeria.
Uthi nabo bebengenakho ukungabaza ngekusasa likaBroos – nakuba bekunemibiko eveza ukuthi bekuzoba umdlalo wakhe wokugcina ne-Algeria ngoLwesibili.
“Akunjalo (akuzange kuphazamiseke) ngoba abanye bethu abazange bawubambe umoya walokho.
“Kodwa ukuvele acacise kube yinto enhle eqenjini ngoba kukhona izindaba ekhempini ezivela kwababonile lokhu ezinkundleni zokuxhumana.
FUNDA NALA: ULarsen uyicaba buthule ebheke kwiPremiership neMagesi
“Kodwa akukaze kuphazamise lutho ekhempini ngoba usiqinisekisile nokuzinikela kwakhe eqenjini.”
