Kubuya izethenjwa kwiBucs, iSwallows iyaxhuga
I-Orlando Pirates izobe seyihlome iphelele uma seyiyodlala idabhi yaseSoweto njengoba sekubuye abadlali abane abamqoka: oNkosinathi Sibisi, Tapelo Xoki, Thabang Monare noPatrick Maswanganyi.
AmaBhakabhaka azoya kulo mdlalo wawo neMoroka Swallows isaphoxekile kulandela ukuthelwa othulini yiSekhukhune United ngo 2-1 ngempelasonto edlule.
Lokhu kuhlulwa ePolokwane kwephule umgqigqo wokunqoba leli qembu likaJose Riveiro ebelizama ukuwubamba.
Isikhala salaba badlali abebesekhempini yeBafana ngekhefu lemidlalo yeFifa sibonakalile emdlalweni odlule, ikakhulukazi oMaswanganyi noTapelo Xoki.
Ngokubuya kukaSibisi, uXoki, Monare, noMaswanganyi, i-Orlando Pirates izokwazi ukubuyisa uzinzo eqenjini.
U’Tito’, isidlaliso sikaMaswanganyi, uzoqinisa esiswini maphakathi nenkundla kanti uXoki uzohola udonga lwasemuva.
IMoroka Swallows yona izobe ingenaye umgadli uGabadinho Mhango ngenxa yesigwebo samakhadi aphuzi amane.
Umqeqeshi uMusa Nyatama angase akhethe phakathi kukaThabang Maponya noLetsie Koapeng, bobabili abangazange basetshenziswe emdlalweni odlule neSpurs.
Njengoba sekuzodlalwa iSoweto Derby, womabili amaqembu azilungiselela impi. ISwallows ihambela phezulu ngemuva kokuqeda ishobolo lokungawini ngokushaya iCape Town Spurs.
Izobe ibheke ukuqhubeka nokukhuphuka isuke ezindaweni eziseduze nezembe.
FUNDA NALA:Â Iphekwa ngomhluzi wenye kwiDStv Prem, koguga utshani
Ngakolunye uhlangothi, i-Orlando Pirates, enqobile emdlalweni wayo odlule neSwallows, inengcindezi yokuphunyula ngemuva kokushibilika embangweni wokubamba indawo yesibili.
