Nalu uhlu lwabaqeqeshi abamataniswa neChiefs
Umqeqeshi wesikhashana weKaizer Chiefs, uCavin Johnson, usefake ingcindezi ephuthumayo kubaphathi bakhe uKaizer Motaung Jr noBobby Motaung.
Ukwehlulwa kwakhe wumsebenzi kwenza kucace ukuthi kudingeka umqeqeshi omusha ozobuyisa izinsuku zenjabulo kuleli qembu.
Kumagama abaqeqeshi amataniswa naMakhosi kubalwa uPitso Mosimane, Benni McCarthy noNasreddine Nabi.
Umqeqeshi wamanje, uJohnson ungene ngo-Okthoba odlule esikhundleni sikaMolefi Ntseki.
Lo mqeqeshi usanqobe imidlalo emihlanu kuphela emidlalweni engu-14.
Ekhuluma ngemuva komdlalo wakamuva, la behlulwe khona yiStellenbosch FC ngo 1-0 besekhaya, uJohnson ukhale ngokuzinikela kwabadlali.
“Impela ngiphoxekile, ngicabanga ukuthi indlela esidlale ngayo ayifikanga ngisho kuhhafu kunale esidlale ngayo ngoMgqibelo.
“Ngingathini nje. Kumele sibuyele emuva siyozama futhi (ukulungisa ejimini),” kusho uJohnson ngemuva komdlalo.
“Mhlawumbe kuzomele sifake abanye abadlali enkundleni, sibone kwenzakalani.
“Kodwa noma kunjalo, impela asizange sidlale kahle namuhla. Angijabule ngendlela abanye babadlali abadlale ngayo.
“Kodwa kumele sibasize ukuze bavuke. Sinomunye umdlalo neChippa United ngempelasonto okumezele sizame kakhulu kuwo.
“Siwadinga ukwedlula wonke amanye amaqembu njengamanje. Kumele siwalwele,” kuqhuba lo mqeqeshi.
Okwamanje, leli qembu lisamataniswa nabaqeqeshi abayisikhombisa abangase bathathe umsebenzi wokulifukula ngesizini ezayo.
Ngokwemibiko, umqeqeshi owake waqeqesha iNigeria, iFC Porto, neSporting Lisbon, uJose Peseiro nguyena ohamba phambili kulo mjaho.
Imibiko yakamuva ithi abaphathi baMakhosi bacele ukuhlangana nemenenja yakhe.
Elinye igama elihamba phambili ohlwini ngelikaNasreddine Nabi.
Lo mqeqeshi waseTunisia wacishe wajoyina Amakhosi ngoJuni 2023.
Izinhlangothi zombili zahluleka ukuvumelana mayelana nabasizi bakaNabi.
IChiefs yenqaba ukuhlukana namanye amalungu ethimba labaqeqeshi akhona njengamanje.
FUNDA NALA: Ibadidile iSwallows, uRiveiro uyabuvuma ubunzima bayo
UNabi ube esejoyina i-AS FAR yaseMorocco okuyiyona ezihola phambili kulogi ngamaphuzu amane njengoba sekusele imidlalo eyisithupha.
Uhlu oluphelele lwabaqeqeshi abamataniswa naMakhosi lumi kanje:
- Jose Pesseiro – Portugal
- Nasreddine Nabi – Tunisia
- Pitso Mosimane – South Africa
- Raul Caneda – Spain
- Benni Mccarthy – South Africa
- Vanderlei Luxemburgo – Brazil
- Alexander Gallo – Brazil.
