Wasalelani uBenni kwelika-2010? UMbazo uza nempendulo
Ukushiywa ngaphandle kukaBenni McCarthy eqenjini lesizwe, iBafana Bafana ngo-2010 yinto eyashiya abaningi bengakholwa.
Phela uMcCarthy wayengumgadlo ohamba phambili wakuleli futhi namanje irekhodi lakhe lamagoli eqenjini lesizwe alikathintwa muntu.
U-Aarom “Mbazo” Mokoena, owayengukaputeni webafana ngesikhathi idlala kwiNdebe yoMhlaba ngo-2010, usedalule isizathu sokuthi uParreira akhiphe uBenni eqenjini.
Lo mgadli wakudala wePorto neBlackburn Rovers wagcina esalile sekukhishwa iqembu lokugcina labadlali abangu-23.
UParreria, owayenqobe iNdebe yoMhlaba neBrazil ngaphambi kuka-2010, wanquma ukusebenza ngoBernard Parker, Katlego Mphela noSiyabonga Nomvethe njengabagadli bakhe.
IBafana yasheshe yaliwasha ijezi njengoba yaphuma esigabeni samaqoqo kulo mqhudelwano yize yayisekhaya.
UMokoena uthi uParreira ngomunye wabaqeqeshi abahamba phambili kwabake bahola iBafana.
“Ngicabanga ukuthi kimina, uCarlos ubengomunye wabaqeqeshi abahamba phambili, uPitso Mosimane angakufakazela lokho,” usho kanje kwi-10bet BetterPod Podcast.
“Lowa mqeqeshi ubekutshela ukuthi uma unamafutha angaphezu kwamaphesenti angu-11% emzimbeni wakho, awudlali eqenjini lakhe.
“Into aqale ayenza, wabiza mina noBenni egunjini lakhe ukuze amtshele ngendaba yesisindo sakhe,” kulanda uMokoena.
“Ngaphambi kwalokho wayenike uBenni izinhlelo zokumsiza ukuthi anciphe kancane.
“Futhi ngosuku lokugcina, mhlawumbe ezinsukwini ezimbili ngaphambi kokuthi amemezele iqembu, wabe esengibiza sinoBenni.
“Wabe esetshela uBenni ukuthi ngeke amfake eqenjini lakhe lokugcina.
“Waze wathi, ‘ungumgadli ohamba phambili eNingizimu Afrika. Kodwa izimiso zami yizimiso zami’.
“‘Ngikholwa ukuthi ukhuluphele kakhulu, ukuba yingxenye yesikwati’…,” kusho uMbazo.
Ngemuva kweNdebe yoMhlaba, uMokoena udlale imidlalo embalwa kuphela ngaphambi kokuthi akhishwe unomphela.
Uyeke ukudlala ezingeni lebhola laamazwe ngamazwe ngemuva kokudlala imidlalo engu-107.
Ngakolunye uhlangothi uMcCarthy wabuyela kwiBafana ngo-2012 ngaphambi kokuhoxa ebholeni lamazwe ngamazwe ngonyaka olandelayo.
FUNDA NALA: URefiloe Jane ubuye kwanyuka amathemba kwiBanyana
Wayesedlala kwi-Orlando Pirates ngaleso sikhathi, la akhombisa khona ukuthi umzimba wakhe awusho lutho.
