Inkakha yeBucs iveza okwenza uMabasa ayithinte kwamancane
SIHLE NGUBO
Owayengumdlali we-Orlando Pirates, uBenedict “Tso” Vilakazi, umbona engcono kakhulu uTshegofatso Mabasa uma eqhathaniswa no-Evidence Makgopa.
Bobabili laba bagadli bayabizwa kwiBafana Bafana kodwa umdlali othandwa kakhulu umqeqeshi weqembu lesizwe uHugo Broos, uMakgopa.
Lo mgadli uyidlale yonke imidlalo yeBafana kwi-Africa Cup of Nations e-Ivory Coast, waze washaya igoli.
Nokho uLittle Napoleon (okuyigama uVilakazi aliphiwa uMuhsin Ertugral) ubona uMabasa ewumgadli ohamba phambili kakhulu.
“UMabasa wenza inhliziyo yami ijabule. Khumbula ukuthi phela uma sidlala kumele kube nomphumela ekugcineni,” kusho uVilakazi kwiDiski TV.
“Uma kungekho muntu ebhokisini sizowuthatha kuphi lowo mphumela wokugcina?
“UMabasa ngokwami noma umuntu angacabangani ngaye, uhlale ekhona ebhokisini.
“Uthola amathuba futhi uyawasebenzisa. Yinto ongeke uyithole kuMakgopa leyo.”
UVilakazi uthe uhlale emeluleka uMakgopa ngokuthi yikuphi lapho kumele abhukule khona.
“Ngihlale ngimtshela uMakgopa ukuthi hlala ebhokisini, uwena wedwa umgadli esinaye emdlalweni.
“Uma ugijima bese uye le eceleni ubani ozongena ebhokisini? Angijabuli ngoMakgopa ngendlela engijabula ngayo ngoMabasa.
“UMabasa wenza kahle kakhulu. Ushaya amagoli manje, uhlale ekhona ebhokisini. Sidinga umgadli onjalo.”
Nokho kumele kucaciswe ukuthi ukusuka kukaMakgopa ebhokisini kusuke kungenxa yendlela yokudlala ayilayelwe umqeqeshi.
FUNDA NALA: UNeil Tovey ucebisa iChiefs ngomqeqeshi ongayivusa
IPirates izobheka amagoli kuMabasa uma seyibhekene naMaZulu emdlalweni we-quarterfinal yeNedbank Cup eMoses Mabhida Stadium, ngoMgqibelo.
