IZambia FA ichitha ezokushona kukaKalaba
ALFRED NGUBANE
Inhlangano eyengamele ibhola eZambia, iZambia Football Association seyiphebeze amanga ngokushona komdlali wakuleliya lizwe uRainford Kalaba.
UReuben Kamanga oyiphini likamengameli wale nhlangano, uvakashele uKalaba esibhedlela alashelwa kuso.
Ubehambisana nezikhulu zebhola laseZambia okubalwa kuzona noClifford Mulenga ophethe uhlaka lweYouth Development.
Bavakashele uRainford Kalaba esibhedlela i-University of Teaching Hospital eLusaka kulandela ukulimala engozini yemoto.
URainford Kalaba wake waba ngukaputeni weqembu lesizwe laseZambia wayekhona eqenjini elanqoba i-Africa Cup of Nations ngo–2012.
Izindaba zokuthi ushonile ngemuva kwale ngozi zidalulwe yiqembu abedlala kulo eDR Congo, iTP Mazembe ngoMgqibelo.
IMazembe ibuye yakhipha esinye isitatimende icacisa ukuthi beyithole ulwazi olungelona lokuthi ushonile uKalaba.
“Sisanda kuthola ngethimba elimelaphayo ukuthi ubengashonile, kodwa ngotokotela abebemfake okuzomenza aquleke isikhashana ukuze bamelaphe.
FUNDA NALA: UMashamaite uyalela iChiefs umgadli ongaxazulula eyamagoli
“Ngemva kwesigameko uKalaba uphuthunyiswe esibhedlela . Iziphathimandla ze-University Teaching Hospital ziqinisekise kwabezindaba ukuthi uKalaba usaphila kodwa isimo sakhe sibucayi.”
