‘Hhay’bo, uyena ngampela,’ kubatshazwa uMpengesi weChippa
Obekuhloswe ukuthi kube wumhlangano wokwethula izinhlelo zokuthuthukisa ibhola e-Eastern Cape, kugcine kususa umsindo ezinkundleni zokuxhumana, abantu bebuzana ngosihlalo weChippa United, uSiviwe “Chippa” Mpengesi.
Into ethuse abantu ngoMpengesi yindlela asebukeka ngayo njengoba esehlise isisindo sakhe, sekunagathi ngomunye umuntu.
Lokhu kuvele esithombeni esifakwe yiChippa United kwi-X, usihlalo ubenomengameli weSouth African Football Association e-East London, uMxolisi “Prince” Sibam emhlanganweni.
UMpengesi ube eseyichaza lento yakhe yokwehlisa isisindo ekhuluma noRobert Marawa muva nje.
“Enye yezinto engizinqumele zona ngo-2023 ukuthi njengomuntu osemehlweni abantu, oyisibonelo kwabaningi, ake ngenze okuhlukile,” kusho uMpengesi.
“Ngelinye ilanga ngibuka kwi-TV la ngivela khona, ngabuka lowa mkhaba angizange ngiziqhenye ngendlela engangobukeka ngayo.
“Bekungathi lo mlisa unebhizinisi leshisa nyama noma lendawo yokucima ukoma.
“Ngathi, ‘cha, cha, cha, kufanele ngenze okuthile ngalesi simo’. Angikwazi ngempela ukudlulwa osihlalo abadala.
“Badala kunami kodwa uma ubabheka babukeka behlakaniphile, bagqoka ngobuhlakani.
“Ngakho ngithe u-2024 unyaka engifuna ukwenza izinto ngendlela ehlukile.”
FUNDA NALA: ULebitso uchaza okwenza adedele ishodi bebhekene neChiefs
Lo somabhizinisi wase-Eastern Cape uthe wehle phakathi kuka-30 kuya ku-35kg.
“Ziningi izinto engizinqamulile empilweni yami. Sengiqale izinto ezintsha, amasiko amasha… ukuya ejimini,” kusho yena.
