AbeMan City neLiverpool sebethembe iChelsea

SIHLE NGUBO

ILiverpool neManchester City bazoba ‘abangani’ beChelsea FC njengoba izotholana phezulu ne-Arsenal emdlalweni we-English Premier League (EPL) e-Emirates Stadium, ngoLwesibili ngo-9 ebusuku.

IGunners iyona ezihola phambili kwilogi ye-English Premier League ngamaphuzu angu-74 emidlalweni engu-33. 

Ilandelwa yiLiverpool ngamaphuzu afanayo emidlalweni efanayo, umehluko amagoli.

Endaweni yesithathu kuhleli iMan City ngamaphuzu angu-73, kanti yona isadlale imidlalo engu-32.

Nakanjani abeLiverpool neMan City bazobe befuna iChelsea iyishaye i-Arsenal ngoLwesibili ebusuku, ukuze ingavuli igebe lamaphuzu amathathu esicongweni.

Sezihubela sakusha manje (kusele imidlalo eyisikhombisa) ngakho amaqembu asembangweni wesicoco seligi asebheke yonke imiphumela ukuthi ihamba kanjani.

I-Arsenal ayiqondakali kule sizini njengoba ibuye ilahle amaphuzu emidlalweni okumele ngabe iyayiwina kulesi sikhathi sesizini.

Ikwenzile lokho emdlalweni odlule ishaywa yi-Aston Villa ngo 2-0 ekhaya.

Ngasohlangothini lweChelsea izama ukuqeda endaweni engcono kwilogi ye-English Premier League ukuze izibeke ethubeni lokudlala imiqhudelwano ye-Uefa ngesizini ezayo.

IChelsea, esendaweni yesishiyagalolunye, ibhubhise i-Everton ngo 6 -0 emdlalweni odlule wePremier League eStamford Bridge.

Abadlali abafana noTrevoh Chalaboh sebethembise ukuthi imidlalo eyisikhombisa esele bazoyithatha njengeyamanqamu, ngemuva kokuphuma kwiFA Cup ngempelasonto.

FUNDA NALA: Izindaba ezimbi ngesikhungo esikhiphe uMofokeng noParker

IChelsea izoqeda isizini ingenayo neyodwa indebe kulandela ukukhishwa kwiFA Cup yiManchester City eyishaye ngo 1-0 eWembley Stadium ngempelasonto.