Phakama Sekhukhune… uMakhubedu ufuna baqophe irekhodi
SIHLE NGUBO
Uwafuna wonke ephelele amaphuzu umqeqeshi weSekhukhune United, uMacdonald Makhubedu, iqembu lakhe elizobhekana nompetha beligi iMamelodi Sundowns.
Umdlalo weDStv Premiership phakathi kwala maqembu, useLoftus Stadium, ngoLwesibili ngo-7.30 ebusuku.
Lo mqeqeshi uveze ukuthi wazi kahle bazobhekana neqembu elinzima kwiSundowns, engakashaywa kule sizini, kodwa lokho akukushintshi ukuthi bawafuna wonke amaphuzu.
“Akusesona isikhathi sokulahla amaphuzu lesi, kuwo wonke amaqembu angu-16,” kusho uMakhubedu.
“Senze kahle kakhulu emidlalweni eyisishiyagalombili edlule. Sizozama ukuthola amaphuzu amathathu.
“Siyazi ngeke kube lula kuwona womabili amaqembu kodwa siyawafuna la maphuzu amathathu.”
ISekhukhune izithola isendaweni yesine kwilogi yeDStv Premiership. Inamaphuzu angu-39 emidlalweni engu-24.
ISundowns abazobhekana nayo izihambela yodwa esicongweni ngamaphuzu angu-53 emidlalweni engu-21.
Emdlalweni odlule iSekhukhune ishaye iCape Town Spurs, ebheke ehlathini, ngo 1-0.
ISundowns yona igcine ibambane ngo 2-2 neMoroka Swallows emdlalweni eyayihamba phambili kuwona ngo 2-0.
Ngemuva kwalokho ezikaRulani Mokwena zishaywe yi-Esperance ngo 1-0 emlenzeni wokuqala womdlalo owandulela owamanqamu weCaf Champions League, eTunisia.
“Sifuna ukuqeda endaweni enhle kwilogi. Kumele siqinise indawo yethu kwiTop 8,” kuqhuba uMakhubedu.
FUNDA NALA: AbeMan City neLiverpool sebethembe iChelsea
“Sizokwenza konke okusemandleni ethu ukuthi senza isiqiniseko sokuthi wonke umuntu osondelene neSekhukhune uyajabula. Ngiyifisela inhlanhla iSekhukhune.”
