Ziyelekana izihibe kuJohnson onengcindezi kwiChiefs
Ngaphezu kwengindezi anayo yokududulela iKaizer Chiefs kwiTop 8, uCavin Johnson kuzomele aqhubeke nalowo msebenzi eshodelwa abadlali kule mpelasonto ezayo.
IChiefs inomdlalo weDStv Premiership okubalulekile ukuthi iphume namaphuzu kuwo ukuze igcine inethuba lokuphelela ngaphakathi kwiTop 8.
Lezi zinkunzi zaseSoweto zizodudulana nezaseThekwini, AmaZulu FC eMoses Mabhida Stadium ngeSonto ngo-5.30 ntambama.
Amaphuzu amabili kuphela ahlukanise lamaqemnbu kanti iChiefs ivale umnyango kwiTop 8 njengamanje.
Uma Usuthu lungayiqumba phansi, yilona oluyobe selugxumela phakathi kulamaqembu azodlala kwiMTN8 ngesizini ezayo.
UJohnson uzoya kulo mdlalo abadlali abathathu bengekho. Kuzothatha amehlo ke ukuthi uzomisa kanjani.
Izitobha zakhe okubukeka ezethemba kakhulu, oGiven Msimango no-Edmilson Dove bamisiwe kulandela ukuthola amakhadi abomvu emidlalweni edlule.
UMsimanga uzobe esemiswe kowokugcina bese eyabuya kolandelayo. UDove yena lona kuzobe kungowokuqala njengoba emiswe elithole ngoLwesibili ikhadi elibomvu.
Nasebhentshini konozinti kuzobhekeka ukuthi ngabe uzobuyisa u-Itumeleng Khune yini njengoba uBrandon Petersen naye emisiwe.
UPetersen ukhishwe ngekhadi elibomvu bebhekene neTS Galaxy ngoLwesibili kulandela ukulwisana kwakhe nonompempe.
Ngaphandle kukaKhune, uJohnson engazama ukubeka umfana osemncane, uBontle Molefe ebhentshini ngethemba lokuthi uBruce Bvuma ngeke alimale.
AmaZulu wona azobe eshoda ngomgadli wawo oyingozi novamise ukuwahlenga sekukubi uSede Junior Dion omiswe ngesigwebo samakhadi amane aphuzi.
FUNDA NALA:Â Ziyanda izesheli ezizifela ngesihlabani sePirates
Nalu uhlu lwabadlali abamisiwe kule midlalo ezayo yeDStv Premiership:
- Amazulu: Sede Junior Dion
- Chippa United: Eva Nga Bienvenu
- Kaizer Chiefs: Brandon George Petersen, Edmilson Gabriel Dove, Spiwe Given Msimango
- Mamelodi Sundowns: Mosa Spection Lebusa, Ronwen Hayden Williams
- Orlando Pirates: Thalente Wandile Mbatha
- Richards Bay FC: Repo Tercious Malepe
