Izogaya imali eshisiwe iChippa ngemidlalo yaseBuffalo City

SIHLE NGUBO

IChippa United izothola izigidi zemali ngokudlalela imidlalo yayo eBuffalo City Stadium kusukela ngesizini ezayo yeDStv Premiership.

Ngokwesivumelwano esisha phakathi kwamasipala iBuffalo City neChilli Boys, leli qembu lizothola imali engaphezulu kuka-R30-million ngokuletha ibhola lesigaba esiphezulu e-East London.

Lesi sivumelwano seminyaka emithathu sisho ukuthi iChippa izothola okungasenami u-R1.2-million ngomdlalo ngamunye (kweyisikhombisa) ezowuletha eBuffalo City Stadium.

Ngaphezu kwalokho iChilli Boys izothola u-R3.5-million ngoBCM ozobhalwa emajezini ayo.

IChippa iqale ukudlalela imidlalo yayo e-East London ngomzuliswano wesibili wesizini ka-2015/2016. 

Seyivele idlale imidlalo emine eBaffulo City Stadium kusukela ngoFebhuwari nonyaka.

Bazohlukanisa ukudlala imidlalo yabo e-East London naseGqeberha, eNelson Mandela Bay Stadium.

IChilli Boys ithola u-R13.5 million ngonyaka kumasipala iNelson Mandela Bay.

Kuzokhumbuleka ukuthi umdlalo weligi iChippa ewudlale neKaizer Chiefs ubuseBuffalo City Stadium, lapho iChilli Boys inqobe ngo 2-0.

FUNDA NALA: I-Al Ahly ‘izolinga’ iSundowns ngesihlabani sayo

OweNedbank Cup iwuyise eNelson Mandela Bay Stadium, lapho ishaywe khona yi-Orlando Pirates ngempelasonto edlule.