EzakamuvaIbhola

UBradley Grobler uveza azisola ngakho, nerekhodi lamagoli

Umgadli weSuperSport United, uBradley Grobler, angase abe ngophambili ngokushaya amagoli emlandweni Premier Soccer League (PSL). 

Lo mdlali oneminyaka engu-36 useshaye amagoli angu-112 kwi-PSL futhi sekusele kancane kube nguye ohamba phambili.

Isilomo sakudala seBafana Bafana neKaizer Chiefs, uSiyabonga Novethe yiso esisaphethe irekhodi ngamagoli angu-123. 

Igoli likaBradley Grobler alishaye bebhekene neSekhukhune United ngoLwesibili limenze waba ngumdlali wokuqala ukushaya amagoli angu-10 noma ngaphezulu ngesizini yePSL amahlandla amahlanu.

UBradley Grobler ungumdlali wokuqala kwiPSL ukushaya amagoli angu-10 noma ngaphezulu kumasizini amahlanu ahlukene kuze kube manje. 

Lokhu ukwenze ngesizini ka-2010/11 edlala kwiPlatinum Stars, wabe esekuphinda lokhu ngesizini ka-2019/20, 2020/21, 2022/23 nangeka-2023/24, esedlala kwiSuperSport United.

Ngesizini ka-2020/21, uklonyeliswe ngendondo yeLesley Manyathela Golden Boot kulandela ukuba ngumshayimagoli ovelele kwiligi.

Ekhuluma no-Andile Ncube kwiSports Night Amplified kuleli sonto, lo mgadli uvule isifuba ngekusasa lakhe. 

Uthi sabheke ukubuyela kwiBafana Bafana. Phezu kwerekhodi lakhe elihle kwiPSL, uGrobler usadlale imidlalo engu-13 kuphela eqenjini lesizwe, washaya amagoli amabili.

“Eqinisweni, ngicabanga ukuthi lezo zinsuku sezidlulile… kodwa ngeke ngiyeke ukuzama,” kusho uGrobler.

“Angizisoli kakhulu uma kuziwa emsebenzini wami kodwa ukungabi nomthelela omkhulu eqenjini lesizwe kungenye yengizisola ngakho. 

“Ikakhulukazi uma ngicabanga ngendlela ukulimala okungiphazamise ngayo,” kwengeza yena.

Lo mdlali, owake wagijima kwiPlatinum Stars, nokho akakalilahli ithemba ngokubuya kwiBafana.

Usehlale iminyaka engu-11 kumaMatsatsantsa kanti uthe ugculisekile ngakuzuzile yize engazange adlale eqenjini elikhulu. 

Wacise wayijoyina iKaizer Chiefs ngo-2020, kodwa lezi zinkunzi zaseSoweto zavalwa ukusayinisa abadlali.

Kule sizini unamagoli angu-10 nakuba iSuperSport idonsa kanzima. 

“Kule sizini, ngizizwe ngingcono kakhulu. Ngidlale cishe yonke imidlalo.

“Angikacabangi ngokuthatha umhlalaphansi futhi manje ngifuna ukuqopha irekhodi lomshayimagoli ohamba phambili.”