Kambe iWest Ham ingayigila yini iCity, ixove umcimbi
SIHLE NGUBO
I-West Ham iphethe ukhiye wokuvula lapho kuthukuswe khona indebe ye-English Premier League (EPL), esongwayo ngeSonto ntambama e-England.
Leli qembu lizotholana phezulu neManchester City emdlalweni wokugcina we-EPL ngo-5 ntambama. Yonke imidlalo ye-EPL izoqala ngo-5 njengoba kusongwa isizini.
ICityzens, enamaphuzu angu-88 esicongweni, idinga ukunqoba lo mdlalo ukuze ibe ompetha beligi okwesine kulandelana.
Ukuhlulwa yiHammers noma ukudlala ngokulingana nayo, kungavulela i-Arsenal intuba yokuba ngompetha beligi, okuyinto abaningi abayibona ingeke yenzeke.
IGunners izodlala ne-Everton emdlalweni wayo wokugcina weligi. Kumele iwunqobe lo mdlalo bese ithembe ukuthi iWest Ham ayivumi ukushaywa yiCityzens.
Njengamanje i-Arsenal inamaphuzu angu-86 okuchaza kona ukuthi akusekho ezandleni zayo ukunqoba isicoco kodwa seyincike ekutheni iHammers ingashaywa yiMan City.
I-Arsenal kungayiphatha kabuhlungu kakhulu ukungasinqobi isicoco seligi njengoba ibizihola phambili isikhathi esiningi sesizini.
Nokho kubukeka kungekho okungavimba iMan City ukuthi ibhaxabule i-West Ham bese ikhale yemuke naso isicoco.
FUNDA NALA: Uzibona engenambangi ngendodo uRulani Mokwena weDowns
OkweGunners sekuyoba ukunqoba owayo umdlalo ne-Everton, bese ithandazele ukuthi iHammers yenze imilingo engabhekiwe kuyona uma isitholene phezulu neMan City.
