UKhanye usola iChiefs ngokudelela uKhune ‘imhlonipha’
Indlela okwenzeke ngayo emdlalweni la iKaizer Chiefs beyithe izohlonipha kuwo unozinti osehlale iminyakanyaka kuyo, ayizange igculise.
IChiefs beyihlele ukubonga uKhune ngokuqeda iminyaka engu-25 ekuleli qembu emdlalweni wayo nePolokwane City ngoMgqibelo.
Okwenzekile wukuthi aphiwe izipho zamajezi asayinwe abadlali nokuyinto ekhombe ukuthi lo mcimbi ubungahlelwanga ngendlela efanele.
Omunye wabaphoxekile ngendlela iChiefs eyenze ngayo ngalolu suku uJunior Khanye owake wadlala kuleli qembu.
“Ngiphoxeke kakhulu ngethimba labaqeqeshi beKaizer Chiefs,” kusho uKhanhye kwi-iDiski TV.
“Kumele ngikhulume iqiniso, u-Itumeleng Khune uyisebenze kahle kabi iKaizer Chiefs.
“Lena akuyona indlela ohlonipha ngayo inkakha yakho, ngiqonde ukuthi sekungaze kungenelele abalandeli…
“Lapha sikhuluma ngomunye wonozinti abaphambili abake baphuma kuleli lizwe.
“Ngiyabona abantu bakuleli bayamyekisa, futhi angikuqondi ukuthi kwenzeka kanjani lokho.
“Uma ngikhuluma ngqo ngeKaizer Chiefs, angiqondi ukuthi ungene kanjani eqenjini eliya emdlalweni bese esala ebhentshini.
“Uze wangena ngoba sekumemeza abalandeli. Kimi, yinto embi kabi nje leyo.
FUNDA NALA: Wanqatshelwa ‘unina’ uSangweni ukuya kwiChiefs
“Yibona abashilo ukuthi kuzobe kuwumdlalo wakhe wokugcina, ngakho bekumele bamdlalise ke. Le abenze ngayo akuyona indlela yokuhlonipha umdlali.”
