UHugo Broos uthi: ‘Valani imilomo yenu’
SIHLE NGUBO
Umqeqeshi weBafana Bafana, uHugo Broos, uthi uyena owazi ibhola futhi laba abamgxekayo kumele bavale imilomo.
Usho lokhu nje uBroos uyagxekwa ngesikimu asiqalisile ngesikhathi iBafana Bafana ishaywa yiMexico ngo 2-0 emdlalweni wokuvula weNdebe yoMhlaba ngeledlule.
Kulo mdlalo abadlali ababili beBafana Bafana, uSiphephelo Sithole noThemba Zwane, bathole amakhadi abomvu.
IFifa inqume ukuthi uZwane uzohlala imidlalo emithathu yeNdebe yoMhlaba engalithinti ibhola, ngoba akwenzile kudinga inhlawulo enkulu.
IBafana Bafana izobhekana neCzechia emdlalweni wesibili weNdebe yoMhlaba, ngoLwesine ngo-6 ntambama.
Lo mdlalo kumele iwunqobe nakanjani iBafana Bafana ukuze ihlale kwiNdebe yoMhlaba eqhubekayo e-USA, iseCanada naseMexico.
Nokho uBroos uthe ake bathule kancane abantu abathanda ukugxeka, yena uyayazi into ayenzayo.
“Ngisondele eminyakeni engu-40 njengomqeqeshi futhi kunohlangothi lwalo msebenzi lokugxekwa,” kusho uBroos.
“Kulabo abangazi ngenza izinto ngendlela yami futhi angiwulaleli umbhedo osezinkundleni zokuxhumana.
“Angibalaleli abantu ngesinye isikhathi abacabanga ukuthi babalulekile, futhi kumele bagxeke iqembu.
“Ngakho uma ngingabona ukuthi yini abayenzile phambilini, ngicabanga ukuthi kungaba ngcono ukuthi bavale imilomo.”
Lo mqeqeshi waseBelgium uzoshaya kwiBafana Bafana ngemuva kweNdebe yoMhlaba.
