Umisiwe uChavani ngechilo alenza koweDowns neStellies
Unompempe owazifaka ehlazweni ngephutha alenza emdlalweni weNedbank Cup muva nje, uJelly Chavani usemisiwe emsebenzini.
Kuvela ukuthi ikomiti elibuyekeza izinqumo zonompempe zithole ukuthi uChavani wenza elikhulu iphutha ngokuhluleka ukukhipha umdlali wasemuva weMamelodi Sundowns uDivine Lunga emdlalweni owandulela owamanqamu weNedbank Cup bedlala neStellenbosch emasontweni amabili edlule.
ULunga wadlalisa kabi uDevin Titus futhi njengoba ayesevele enekhadi eliphuzi, kwakumele athole elesibili aphume.
Kodwa ngesikhathi kwenzeka lesi sigameko, nomsizi wakhe uJelly Chavani, uZakhele Siwela wabe eseklunyuka umsipha.
UJelly Chavani wabe eselibala wukuyobheka uzakwabo, iSundowns yasala yamkhipha uLunga, yafaka uThapelo Morena endaweni yakhe.
Ngokubika kweCity Press, ikomiti elibuyekeza izinqumo zonompempe libone ukuthi uChavani kwakufanele akhiphe ikhadi lesibili eliphuzi kuLunga kuqala.
Lokhu kwakzosho ukuthi umkhipha ngekhadi elibomvu okwakungashintsha izinto kulo mdlalo. ISundowns yadlulela kowamanqamu, inqoba ngo 2-1.
Ukumiswa kwakhe akucaci okwesikathi esingakanani kodwa kuvela ukuthi ngeke kube nguye ozodlalisa owamanqamu weNedbank Cup.
Lo mdlalo uzoba phakathi kweSundowns ne-Orlando Pirates eMbombela Stadium ngoJuni 1.
Khonamanjalo, iSafa ikuqinisekisile ukuthi kunonompempe abamisiwe nokuthi bazophekwa kabusha ngaphambi kwesizini ezayo.
“Yebo, isinqumo sokumiswa kwabo sesikhishiwe futhi lokho singakuqinisekisa njengeSafa.
“Abanye onompempe bethu bamisiwe kanti abanye sebeyoze babuyele ekuqaleni kwesizini entsha.
“Bonke bazoba yingxenye yomhlangano wokucobelelana ngolwazi ngaphambi kwesizini ngoJulayi lapho bezobe bedingida izichibiyelo zemithetho yomdlalo…
FUNDA NALA: UKhanye usola iChiefs ngokudelela uKhune ‘imhlonipha’
“Bazolungiselela isizini ezayo baphinde babheke okwenzeke ngesizini edlule,” kusho isitatimende seSafa.
