INigeria izodlala neBafana Bafana singekho isethenjwa sayo kowokuhlunga
SIHLE NGUBO
INigeria izobhekana neNingizimu Afrika singekho isethenjwa sayo somgadli, uVictor Osimhen, emdlalweni obalulekile wokuhlungela iNdebe yoMhlaba, eToyota Stadium, eBloemfontein, ngoLwesibili ngo-6 ntambama.
ISuper Eagles izama ngakho ukuzibekisela indawo kwiNdebe yoMhlaba ese-USA ngonyaka ozayo, yize iqale kabi emidlalweni yokuhlunga.
Isakwaze ukunqoba imidlalo emibili kuphela, yadlala ngokulingana emine, yase ishaywa kowodwa kweyisikhombisa esiyidlalile.
Lokhu kuyenza isale ngamaphuzu ayisithupha kwiBafana Bafana ezihola phambili ngamaphuzu angu-16 kuGroup C.
INigeria kumele iyinqobe yonke imidlalo emithathu yokuhlunga eyisalele ukuze izibeke ethubeni lokuya kwiNdebe yoMhlaba ngonyaka ozayo.
Uma ishaya iBafana Bafana ngoLwesibili izovala igebe libe ngamaphuzu amathathu nezikaHugo Broos.
Nokho izoya kulo mdlalo ngaphandle kuma-Osimhen othinteke ngesikhathi iNigeria ishaya iRwanda ngo 1-0 emdlalweni wokuhlunga ngoLwesihlanu.
Ngokwesitatime esikhishwe yiNigeria, lo mdlali weGalatasaray yaseTurkey, ngeke ahambe neqembu uma seliya eNingizimu Afrika.
Bekubukeka sengathi uthinteke iqakala kodwa udokotela weqembu uqinisekise ukuthi “ubhuzuke esiqhomeni ngakho uvuke engazizwa kahle.”
Lo mdlali, oke wayibamba kwiNapoli, kuvela ukuthi uzobuyela eqenjini lakhe eTurkey njengoba engasezukuba yingxenye yesikwati esiya eNingizimu Afrika.
Ngasohlangothini lweBafana ukunqoba kwiNigeria kuzosho ukuthi isizibekisele indawo kwiNdebe yoMhlaba, ngaphambi kokudlala imidlalo emibili yokugcina.
Ngenyanga ezayo iBafana Bafana izobhekana neZimbabwe, bese ivale imidlalo yokuhlunga yeNdebe yoMhlaba ngokudlala neRwanda.
