UMakaab ucacisa ngekusasa lika-Olisa Ndah kwiBucs
Ngemuva kokuphothulwa kwemidlalo yeDStv Premiership yesizini ka-2023/24, imenenja yabadlali engumakadebona, uMike Makaab useqede ukugaqela ngekusasa lika-Olisa Ndah we-Orlando Pirates.
AmaBhakabhaka aqede isizini ehlezi endaweni yesibili kwiligi ngemuva kokuthi iMamelodi Sundowns iqoqe isicoco sesikhombisa kulandelana.
IPirates inqobe imidlalo engu-14 kwiPremiership, yadlala ngokulingana eyisishiyagalombili, yabe seyihlulwa kweyisishiyagalombili emidlalweni engu-30. Iqoqe amaphuzu angu-50.
Lezi zinkunzi zaseSoweto ziphinde zanqoba isicoco seMTN8 ka-2023 ekuqaleni kwesizini ngemuva kokuhlula iSundowns kumaphenathi eMoses Mabhida Stadium.
Yize abezindaba bebika ukuthi inkontileka ka-Olisa Ndah iyaphela ngoJuni 2024, uMakaab ukucacisile ukuthi lo mdlali wasemuva usalelwe yiminyaka emibili esivumelwaneni sakhe namaBhakabhaka.
U-Olisa Ndah usehlale kwiPirates amasizini amathathu ngemuva kokusayina inkontileka yeminyaka emihlanu esuka eqenjini laseNigeria i-Akwa United ngo-2021.
Ngonyaka odlule, lo mdlali wasemuva oneminyaka engu-26 ubefunwa yizinkunzi zase-Italy, iSassuolo.
Nokho leli qembu alibange lisaqhubeka nezingxoxo ngemuva kokulimala kwakhe.
Ekhuluma neFARPost, uMakaab uthe: “U-Olisa Ndah usalelwe eminye iminyaka emibili kule nkontileka ekhona.
“Akukhona ukuthi kusetshenziswe umbandela wokwelula. Inkontileka anayo njengamanje isineminyaka emibili (esele0.”
U-Olisa Ndah udlale imidlalo engu-23 kuyo yonke imiqhudelwano kule sizini.
FUNDA NALA: USukazi uveza okwenze baqoke iFC Augsburg
Kungenzeka adlale oka-24 uma sebebhekene neMamelodi Sundowns kowamanqamu weNedbank Cup ngoMgqobelo.
