Ikhilikithi

Kuhamba kahle kumaProteas, asedlulele kwiSuper 8

SIHLE NGUBO

AmaProteas adlulele kwiSuper 8 yeNdebe yoMhlaba yeT20, yize esasalelwe umdlalo owodwa wamaphuzu kuGroup D.

Lokhu kulandele ukungaqhubeki komdlalo phakathi kwiSri Lanka neNepal ngenxa yemvula. La maqembu athole iphuzu lilinye ngokungawudlali lo mdlalo ngenxa yesimo sezulu.

INingizimu Afrika izihola phambili ngamaphuzu ayisithupha kuGroup D, kulandela ukunqoba imidlalo emithathu yokuqala yeNdebe yoMhlaba yeT20. Iqembu lakuleli livule ngokushaya iSri Lanka, lalandelisa ngeNetherlands, kwase kwaba yiBangladesh.

Emdlalweni wokugcina kugqame uHeinrich Klaasen, oshaye ama-run angu-46, waqokwa njengomdlali ovelele. UKlaasen uthe kunzima ukubhetha kule wikhethi yaseNew York.

“Ngicabanga ukuthi uDavid (Miller) usikhombisile emdlalweni odlule (sibhekene neNetherlands) ukuthi iyiphi indlela yokubhetha kule wikhethi. Yindlela efanayo nesibhetha ngayo uma siphakathi nama-over sidlala umdlalo wosuku olulodwa,” kusho uKlaasen ngemuva komdlalo.

“Ngakho indlela yethu yokucabanga ayisondele nakancane emdlalweni weT20. Udinga ukungena ubhethe, ushaye i-run eyodwa ebholeni ngalinye. Siyazi ukuthi kuzovela amathuba okushaya ibhola ukwazi ukwenyusa ama-run afunekayo i-over ngayinye.”

Emdlalweni wokugcina wamaqoqo amaProteas azobhekana neNepal e-Arnos Vale Ground, eKingstown. Azobe eqala ukuyodlala eWest Indies kulo mqhudelwano, njengoba imidlalo yokuqala emithathu eyidlalele eNew York.