I-Bay ihlwithe i-Arrows iqatha emlonyeni ngomdlali
PHILI HLONGWANE
IRichards Bay FC iphuce iLamontville Golden Arrows iqatha emlonyeni ngempelasonto, ngenkathi isayinisa umdlali onekhono, uSibani Khumalo.
UKhumalo, oneminyaka engu-20, ubengumdlali weMkhumbane Classic egijima kwi-ABC Motsepe League, KwaZulu-Natal. Lo mdlali ubeseqalile ukuzilolonga naBafana Bes’thende sekuvalwe imidlalo yeligi, ngethemba lokuthi uzothola inkontileka.
Ngempelasonto ubedlalela i-Two for Joy kwiKhabba Cup ebiseKing Zwelithini Stadium, eMlaza. UKhumalo uphenduke isilomo kulo mqhudelwano waze waqokwa njengomdlali ovelele. Iqembu lakhe, i-Two for Joy yilona elidle umhlanganiso kwiKhabba Cup ka-2024.
Ngokusho komthombo weMpempe, ukuphunyukwa yilo mdlali akwehlanga kahle kubaphathi be-Arrows, njengoba ubeziqeqesha nayo ngaphambi kweKhabba Cup.
Maningi amaqembu abemcathamela lo mdlali kodwa kugcine kuphumelele iNatal Rich Boyz. Leli qembu laseMhlathuze liphinde lahlabana ngomunye umdlali okuthiwa uFezile Gcaba, odlala maphakathi emuva.
UGcaba ubedlalela Insephe FC kwiKhabba Cup ngempelasonto. Insephe yehlulwe kweyandulela owamanqamu kulo mqhudelwano.
Naye lo mdlali bekubatshazwa ikhono lakhe kwiKhabba Cup. Ngesizini edlule uGcaba ubedlalela uMkhumbane Classic benaye uKhumalo. Impempe ingakuqinisekisa ukuthi naye uGcaba usethole inkontileka kwiBay.
Leli qembu lizabalazela ukuhlala kwiDStv Premiership njengoba lidlala imidlalo yokuhlunga lapho lishikilisana neBaroka FC ne-University of Pretoria. IBay neTuks banamaphuzu amane, kanti iBakgaga inamabili.
La maqembu (iNatal Rich Boyz neTuks) azobhekana emdlalweni okuyiwona ongase ucacise iqembu elizoyibamba kwiPremiership ngesizini ezayo, eTuks Stadium, ngoMgqibelo ngo-3 ntambama. Elizonqoba lapha liyobe seliwele ngelibanzi.