IChiefs ikhomba indlela abathathu njengoba ishanela umuzi wayo
IKaizer Chiefs seyithathe isinqumo sokudedela abadlali bayo abathathu abanamagama abebephelelwa yizinkontileka njengoba kugoqwa inyanga uJuni.
Ngokubika kweSABC Sport, uKeagan Dolly, uSiyethemba Sithebe noSifiso Hlanti, sebetsheliwe ukuthi ngeke besadingeka kuleli qembu ngesizini ezayo. Laba badlali bangabanye balabo abebelindile ukuthi izinkontileka zabo ziyavuselelwa yini kuMakhosi njengoba kuzofika umqeqeshi omusha.
UDolly uhlale isizini edlule yonke engadlali, ngaphandle kwemidlalo embalwa. Lo mdlali owake wayibamba kwiMamelodi Sundowns, ngaphambi kokuya phesheya, ubehlushwa ukulimala kwiChiefs.
Bekunemibiko yokuthi ubehola imali elinganiselwa ku-R1 million ngenyanga uDolly. Uma lokhu kuyiqiniso kuzobhekwa ngabomvu ukuthi uzosayina kuliphi iqembu njengoba esededelwe yiChiefs.
USithebe ufike kwiChiefs ethembisa kodwa izinto zangahamba kahle. Ubeshaya into ecokeme kuMaZulu FC nokwenze ukuthi iChiefs imhlwithe ngaphambi kokusayina inkontileka entsha. KuSuthu uhambe kungasekuhle njengoba umengameli walo, uSandile Zungu, enqume ukuthi angabe esadlaliswa ezinyangeni ebezisele ngaphambi kokujoyina Amakhosi.
UHlanti usayine kwiChiefs esuka kwiBidvest Wits, engasekho, kodwa bekumele ajike kwiMoroka Swallows ngoba leli qembu belimisiwe ukusayinisa abadlali ngo-2020. Nokho uhlalile kwiChiefs ngoba inkontileka yakhe ize yavuselelwa ngonyaka kade seyiphela.
Umthombo weSABC ohogele ukuchithwa kwalaba badlali, uthe kuthande ukuba muncu ngesikhathi izindaba zifika kubona.
“Abadlali babiziwe namuhla (ngoLwesibili) base betshelwa ukuthi izinkontileka zabo ngeke zisavuselelwa,” kusho umthombo.
“Ngicabanga ukuthi lena yindlela ezenziwa ngayo izinto eqenjini kulezi zinsuku. Yinto engeyinhle lena kubadlali osekumele manje baqale bafune umsebenzi ezinsukwini ezimbalwa ezizayo – sikholwa ukuthi bekumele batshelwe ngendlela engcono abadlali.”
Akukudala kuvele ukuthi uNjabulo Ngcobo usendleleni ephumayo kuleli qembu laseNaturena, ubheke kwiSekhukhune United. Bakhona abanye abadlali okulindeleke ukuthi balandele bashiye iChiefs.
