Ngabe ushintsho eNaturena luzobuyisa injabulo kubalandeli beChiefs?
SIHLE NGUBO
Akukho ukungabaza ukuthi ingcindezi enkulu ithe mbe kwiKaizer Chiefs njengoba amaqembu eDStv Premiership elungiselela isizini ezayo ka-2024/2025.
Leli qembu laseNaturena kubhekwe ukuthi lethule umqeqeshi omusha, okulindeleke ukuthi uza nethimba lakhe labaqeqeshi. Ngemuva kwalokho kuzobe sekuhlaluka ukuthi yibaphi abadlali abahambayo nabafikayo.
Sekuyinto eyaziwayo ukuthi Amakhosi kulindeleke amemezele ngokusemthethweni uNasreddine Nabi, ongumqeqeshi waseTunisia. Njengamanje usabambeke kwiFAR Rabat yaseMorocco, asaqedela isizini nayo.
UNabi ulindelwe ukuthi afike namaphini akhe amabili, uFernando Da Cruz noKhalil Ben Youssef. Umqeqeshi wonozinti, okuthiwa vele usekhona eNingizimu Afrika, ngu-llyes Mzoughi, kanti iScience & Conditioning Coach, uMe adji Safi. Kukhona ne-Video Analyst, u-Ayman Makroud.
Bonke laba abangenhla abaqinisekisiwe kodwa amahemuhemu athi kuzobe kumi kanje eNaturena ngesizini ezayo. Lokhu kushintsha yonke into okungaziwa kuphela ukuthi lolu shintsho luzothatha iqembu lilise kuphi.
Iqiniso ukuthi abalandeli beChiefs balambile ngakho uNabi nethimba lakhe bazofikela kwingcindezi eyisimanga. Akwaziwa noma abalandeli bazokwazi yini ukulinda banike uNabi nezakhe ithuba lokubumba iqembu eliqinile.
Okunye okushiya imibuzo ukuthi ngabe umqondo omuhle yini ukuba namaphini amabili angazi lutho ngebhola laseNingizimu Afrika. Kuke kwavela ukuthi iChiefs izama ukuthola uDan “Dance” Malesela noma uLehlohonolo Seema ukuthi oyedwa abe yiphini lomqeqeshi. Nokho wonke amahlebezi azophela uma iChiefs isicacisa ngomqeqeshi wayo wesizini ezayo.
Okuhlalukayo okwamanje ukuthi uzophela umsebenzi kuDillon Sheppard, obeyiphini lomqeqeshi kwiChiefs, no-Aubrey Mathibe, obengumqeqeshi wonozinti. UCavin Johnson, obebambile njengomqeqeshi weChiefs, naye angase akhonjwe eza ngayo eNaturena. Wafika ezoba yinhloko yenkulisa.
Ngabe ushintsho luzobuyisa izinsuku zenjabulo kuBafana Bokuthula Noxolo?