USirino usegcine eshiyile kwiSundowns
SIHLE NGUBO
UGaston Sirino usegcine ededeliwe yiMamelodi Sundowns kulandela imibiko yakudala ukuthi uzogcina eshiyile kuleli qembu laseChloorkop.
Lokhu kuqinisekiswe iyona iSundowns eveze ukuthi uSirino, uBrian Onyango, uBongani Zungu noThabiso Kutumela ngeke besaba yingxenye yeqembu ngesizini ezayo. USirino useke wamataniswa namaqembu asenhla ne-Afrika.
Akhona namahlebezi athi iKaizer Chiefs ibisibhekile isimo sikaSirino njengoba izama ukwakha iqembu kabusha. Akukacaci ukuthi lo mdlali oneminyaka engu-33 uzobuyela kubo e-Uruguay noma uzohlala eNingizimu Afrika.
Omunye umdlali okuvela ukuthi ngeke esabuya kwiSundowns uJunior Mendieta. Imibiko engaqinisekiwe ithi lo mdlali angase ayodlala eGreece ngesizini ezayo. Ukuhamba kwalaba badlali kuzokwenza umehluko omkhulu kwiSundowns ejwayele ukudlala imidlalo eminingi ngesizini eyodwa. Lokhu kwenziwa ukuthi ibuye iyibambe kwiCaf Champions League, kanti kukhona nemiqhudelwano yasekhaya emithathu uma ingabalwa iDStv Premiership.