Ezintsha ngoRulani Mokwena nokushiya eChloorkop
SIHLE NGUBO
Ezivela eChloorkop, ezingaqinisekisiwe, zithi umqeqeshi uRulani Mokwena usethathe amasakana akhe wabona eze ngayo.
NgoLwesibili kuvukwe nezindaba ezithi lo mqeqeshi akaboni ngaso linye neSporting Director yeqembu, uFlemming Berg. Kuthiwa laba abatholani mayelana nabadlali okumele bahambe nalabo okumele basayiniswe.
Kuthiwa usihlalo weSundowns, uTlhopi Motsepe, uvele usebatshelile abadlali ukuthi uMokwena uyahamba nokuthi kumele balindele umqeqeshi omusha. Naye lo mqeqeshi kuvela ukuthi uvalelisile kubadlali ekuseni ngoLwesibili.
Okusele manje ukuthi kuvunyelwane ngemali ezotholwa yilo mqeqeshi njengoba ebesasalelwe yinkontileka yeminyaka emithathu. Iqembu kulindeleke ukuthi likhiphe isimemezelo maduze ngokuhamba kukaMokwena.
ISundowns isanda kushiywa abadlali abane, uGaston Sirino, uBrian Onyango, uBongani Zungu noThabiso Kutumela. Kuvela ukuthi noJunior Mendieta akabuyi njengoba ememezele ukuthi useyodlala eGreece ngesizini ezayo.
Ngabe lokhu kuyisiqalo sezinkinga eChloorkop?