Kugcine kumenele uScreamer Tshabalala
SIHLE NGUBO
Sekugcine kuyenele inkakha yebhola yaseNingizimu Afrika, uStanley “Screamer” Tshabalala, obezama ukuphola emanxebeni okudutshulwa.
Ngokwesitatimende se-Orlando Pirates, agcine ukusebenza kuyona, uTshabalala unqotshwe yiwona la manxeba. NgoMashi 21 nonyaka uThandi Merafe, okhulumela iPirates, wathumela isitatimende siveza ukuthi le nkakha isesibhedlela kulandela ukudutshulwa.
Isitatimende sasifundeka kanje: “Owayengumqeqeshi weBafana Bafana, uStanley “Screamer” Tshabalala, uyelulama esibhedlela.
“Udutshulwe izolo (ngoMashi 20) ngesikhathi kugqekezwa emzini wakwaTshabalala.
“Bekusemini ngemuva kancane kwezikhathi zamadina. Udaba selusezandleni zeSouth African Police Services (SAPS) manje.
“Umndeni wakwaTshabalala uyabonga kakhulu ngemilayezo namazwi okuwududuza kulesi sikhathi.
“Ucela ukunikwa isikhathi sokwenza izinto ngasese njengoba uBra Stan ezama ukululama.”
UScreamer Tshabalala wake wadlalela iKaizer Chiefs ngesikhathi isanda kuba khona, futhi ungomunye wezinkakha zayo ezihlonishwayo. Uke waqeqesha kwiMamelodi Sundowns neMoroka Swallows.
