EzakamuvaiDStv Premiership

Oxoshwe yiChiefs ethubeni lokuthola iqembu phesheya

Useshintshe umqondo ngokusayina kwiSuperSport United uKeagan Dolly, ochithwe yiKaizer Chiefs, emasontweni edlule.

Ngokubika kweDiski Times uDolly bamthole ekulungele ukuthi angadlalela iSuperSport kodwa usethole elinye ithuba lokuyodlala phesheya kwezilwandle. Kuthiwa umqeqeshi uGavin Hunt ubefisa ngakho konke ukuba nalo mdlali oneminyaka engu-31 kwiSuperSport kodwa abaphethe izindaba zakhe sebekhuluma eyokuya phesheya.

UDolly ungomunye wabadlali abachithwe yiChiefs emasontweni edlule. Kubona kukhona noSiyethemba Sithebe, uSifiso Hlanti, kanti uNjabulo Ngcobo usendleleni ebheke kwiSekhukhune United. 

UDolly ufike kwiChiefs evela kwiMontpellier yaseFrance. KuMakhosi udlale imidlalo engu-67, washaya amagoli angu-14, wasiza ukwakha angu-11. Lo mdlali bekuthiwa uhola imali elinganiselwa ku-R1 million kwiChiefs, yize kuyinto engazange iqinisekiswe.

Okwamanje akuveli ukuthi yiliphi iqembu laphesheya axoxa nalo kodwa kubukeka sengathi ngesizini ezoqala uzobe engekho eNingizimu Afrika.