Kuzohlonishwa uMosimane ngeziqu zobudokotela
UZOZIMAZISWA abaqeqeshi base-Afrika abanohlonze umcimbi wokuhlonishwa kukaPitso Mosimane (59) ngeziqu zobudokotela (Honorary Doctorate) e-FNB Stadium eGoli ngoLwesithathu oluzayo.
UMosimane uzochonywa uphaphe lwegwalagwala i-University of Johannesburg ngenxa yamagalelo akhe ebholeni esengumdlali nomqeqeshi.
Phakathi kwabaqeqeshi ekulindeleke batheleke uWalid Regragui waseMorocco, owaqopha umlando efaka leli lizwe eliseNorth Africa kweyandulela owamanqamu weNdebe yoMhlaba ngo-2022 eQatar.
Kuvela igama lika-Aliou Cisse waseSenegal owanqoba i-Africa Cup of Nations (Afcon) esengumdlali ngo-2002, waphinde wayiphakamisa esengumqeqeshi ngo-2022. Omunye uJean-Florent Ibengé owake waqeqesha iqembu lesizwe langakubo iDemocratic Republic of Congo (DRC).
Uyahlonishwa njengoba anqoba isicoco seConfederation Cup neRS Berkane yaseMorocco. Njengamanje ulolonga i-Al-Hilal yaseSudan.
Bonke laba baqeqeshi bayezwana kakhulu noMosimane njengoba bevamise ukuthintana ngezingcingo nangendlela yokuxhumana kwesimanjemanje becebisana ngamaqhinga asebholeni.
I-MT Sports Marketing & Management ephethe izindaba zikaMosimane ithe isimagange ilindele usuku lomcimbi, okuvela ukuthi uhlelo lwakhona luzobe luphethwe uqweqwe lomethuli wezemidlalo, uRobert “Madluphuthu” Marawa.
Le nkampani ithe njengamanje uMosimane usacubungula izicelo zamaqembu aphesheya amfunayo yathi kodwa akajahile ukuthatha isinqumo ngoba ufuna ukuthatha umsebenzi ozomphonsela inselelo.
Usanda kubuya eSaudi Arabia lapho ehluleke ukuvikisa izembe i-Abha ayijoyine maphakathi nesizini. Lokhu kwehluleka kulingcolisile igama lakhe kwazise usezakhele igama ngokunqoba isicoco seCaf Champions League kathathu neMamelodi Sundowns ne-Al Ahly yase-Egypt, ngokwehlukana.
Kwi-Al Ahly wahamba eseyinqobele nesicoco seLigi neseCaf Super Cup. ESaudi Arabia wafika ngeshodi njengoba anyusela esigabeni esiphezulu i-Al Ahli Jeddah. Uyishiyile wayothi xhinti kwi-Al Wahda yase-United Arab Emirates.