UMaduka neThwihli Thwahla bayilungele iBetway Premiership
PHILI HLONGWANE
UJohn Maduka, oqeqesha iRoyal AM, uthi bayibheke ngabomvu isizini entsha yeBetway Premiership njengoba sekuzosuka umshikashika.
Lo mqeqeshi usho lokhu ngemuva kokuthi iqembu lakhe lishaye iMaritzburg United ngo 4-3 sekukhahlelwa amaphenathi emdlalweni wamanqamu weKZN Premier’s Cup, ePrince Mangosuthu Regional Stadium, Olundi, ngeSonto ntambama.
EzikaMaduka ziqale zashaya AmaZulu FC kowandulela owamanqamu ngaphambi kokuthi ziyotholana phezulu neTeam of Choice. Lo mqeqeshi uthe bami ngomumo ukuqala isizini entsha.
“Siyilungele isizini entsha futhi siyibheke ngabomvu. Siyazi kuzoba yisizini enzima futhi ngoba asenzanga kahle ngesizini edlule. Asisakwazi ukulinda ukuthi kuqale isizini entsha,” kusho uMaduka.
“Sifuna ukulungisa noma yini esingayenzanga kahle ngesizini edlule. Kulokhu sifuna ukuba nesizini ehlukile.”
Ukunqoba iPremier’s Cup akungabazeki ukuthi kuzokwenza iThwihli Thwahla iqale isizini entsha inokuzethemba okukhulu.
“Awukho umgomo esibekelwe wona njengeqembu kodwa sihlale sizimisele. Sihlale sifuna ukunqoba, sihlale sifuna ukuncintisana” kuqhuba uMaduka.
“Umdlalo nomdlalo esiwudlalayo sisuke sifuna ukwenza kahle. Zonke izindebe esidlala kuzoba sisuke sifuna ukwenza isiqiniseko sokuthi senza kangcono. Sizimisele ngokwenza kahle kule sizini siqede kwiTop 8.”
