Ngabe uSirino uzogqama kwiChiefs?
SIHLE NGUBO
UGaston Sirino usejoyine abadlali abaningi abasuke kwiMamelodi Sundowns basayina kwiKaizer Chiefs.
Lo mdlali wase-Uruguay oneminyaka engu-33, kulindeleke ukuthi ethulwe yiqembu laseNaturena ngokusemthethweni maduze. Kuvela ukuthi usayine inkontileka yeminyaka emibili neChiefs.
Kubadlali abasuke kwiSundowns baya kwiChiefs singabala uKatlego “Killer” Mphela, uKhama Billiat, uLeonardo Castro noRamahlwe Mphahlele. USirino kuvela ukuthi uzogqoka unombolo 10 kwiChiefs.
Lo mdlali ungowesithathu osesayine kwiChiefs njengoba kuvulwe iwindi lokusayinisa abadlali. Abanye uBongani Sam osuka kwi-Orlando Pirates nonozinti uFiacre Ntwari obekwiTS Galaxy.
IChiefs iseBotswana lapho iyoqedela khona amalungiselelo esizini entsha. Izovula isizini ngokubhekana neMarumo Gallants koweBetway Premiership.
Ngabe uSirino uzofika agqame kwiChiefs?