Zisulekile izinyembezi kuSimbine benqoba isiliva kwiRelay

SIHLE NGUBO

U-Akani Simbine ugcine eyitholile indondo kuma-Olympic kulandela ukunqoba indondo yesiliva kweNingizimu Afrika kwi-4×100 Relay eParis eFrance, ngoLwesihlanu.

Ebambisene noBayanda Walaza, uShaun Maswanganyi noBradley Nkoana, uSimbine ugile izimanga ecisho ebuya negolide kulo mjaho kodwa kwagcina kuyiCanada edle umdlanganiso. Iqembu lasekhaya iFrance, nezethenjwa i-USA abalibonanga elidlalayo.

Akungabazeki ukuthi uSimbine uzosuleka izinyembezi kulandela ukugejeka kancane kwi-100m lapho ephume khona isine. Kulo mjaho umhlanganiso wadliwa unontandakubukwa uNoah Lyles wase-USA.

Ukubuya nesiliva kweNingizimu Afrika kwiRelay 4×100, kusho ukuthi iqembu lakuleli eliyibambe kuma-Olympic selinezindondo ezinhlanu. Lokhu kuzokwenza ukuthi libuye lihloniphekile kule midlalo esongwa ngeSonto eParis.