EzakamuvaI-MTN 8

Kuhlehliswe umdlalo weMTN8 weCity neBucs

Umdlalo womlenze wokuqala weMTN8 phakathi kweCape Town City ne-Orlando Pirates, sewuhlehlisiwe ngenxa yesimo sezulu esingesihle eKapa.

Lo mdlalo bekumele ube ngoLwesibili, eDHL Stadium, ngo-7.30 ebusuku kodwa sewuhlehliselwe uLwesithathu ngo-6 ntambama. Kuvele ukuthi ngoLwesibili ngeke kudlaleke eWestern Cape ngenxa yesimo sezulu.

Isinqumo sokuhlehlisa umdlalo senziwe ngokulandela iseluleko seziphathimandla zedobhola iKapa nabaphathi benkundla. Kuthiwa kuzoba nomoya ozobe uhamba ngesivinini sika-67 km/h ngoLwesibili. 

Ukungabi kuhle kwesimo sezulu eKapa sekuholele ekutheni kubhidlike izakhiwo kuphinde kuvaleke imigwaqo ngenxa yezihlahla eziphukayo. Lokhu kuchaphazela nasezintweni ezisenkundleni.

Amathikithi omdlalo azobe esasebenza njengoba umdlalo uhlehliselwe oLwesithathu. Komunye umdlalo owandulela owamanqamu weMTN 8 kuzotholana phezulu iMamelodi Sundowns neStellenbosch FC eLucas Moripe Stadium ngoLwesithathu, ngo-7.30 ebusuku