UMshishi uyena ozogqoka ibhande likakaputeni kweyeBafana

SIHLE NGUBO

Umqeqeshi weBafana Bafana, uHugo Broos, useqoke uThemba “Mshishi” Zwane ukuthi ahole iqembu njengoba lizodlala imidlalo yokuhlunga ye-Africa Cup of Nations (Afcon).

URonwen Williams okunguyena ukaputeni weqembu lesizwe, usazama ukululama ngokuphelele ekulimaleni akuthole sekuzophela isizini edlule. Lo nozinti akadlali naseqenjini lakhe iMamelodi Sundowns njengoba bekuvimbe uJody February emidlalweni yeMTN 8. ISundowns igcine ikhishwe yiStellenbosch FC kweyandulela owamanqamu.

Esikwatini sikaBroos kugqame ukungena okokuqala kukanozinti we-Orlando Pirates, uSipho Chaine, nokusala ngaphandle komdlali wasesiswini we-Al Ahly, uPercy Tau. Uma kubhekwa ifomu kaChaine angase alithole ithuba lokuvimba kule midlalo emibili yeBafana.

Umdlali weChiefs okhona kulesi sikwati uRushin Dortley, odlala emuva kwesokunxele. IBafana izobhekana ne-Uganda kowokuhlungela i-Afcon ngoLwesihlanu ekhaya, bese iphinde idlale neSouth Sudan ngoSepthemba 10 ekuhambeni.

Selilonke iqembu lesizwe likaBroos limi kanje:

Onozinti: Ricardo Goss; Veli Mothwa; Sipho Chaine

Izitobha: Nyiko Mobbie; Thapelo Morena; Rushwin Dortley; Nkosinathi Sibisi; Khuliso Mudau; Fawaaz Basadien; Siyabonga Ngezana; Grant Kekana; Aubrey Modiba

Abasesiswini: Teboho Mokoena; Jayden Adams; Siphephelo Sithole; Thalente Mbatha

Amafolosi: Themba Zwane; Oswin Appollis; Patrick Maswanganyi;  Elias Mokwana; Lyle Foster; Relebohile Mofokeng; Iqraam Rayners