USaleng ujabule ngegoli elinqobise iPirates ekugcineni
SIHLE NGUBO
Uveze ukuthi ukujabulele ukugcina elitholile igoli umdlali we-Orlando Pirates, uMonnapule Saleng, ngesikhathi bebhekene neChippa United.
Usho kanje ngemuva kokuthi ezakhe zinqobe ngo 2-1 emdlalweni weBetway Premiership e-Orlando Stadium, ngoLwesithathu ebusuku.
Lo mdlali uqokwe njengoshaye into ecokeme kulo mdlalo obushisa ubuye ubande.
“Ngibonga abalandeli, yithimba labaqeqeshi nabadlali,” kusho uPule kwiSuperSport TV ngemuva komdlalo.
“Kuhle kakhulu ukuthi sithole amaphuzu amathathu sanqoba, ikakhulukazi ngoba bekungumdlalo wokuqala weligi ekhaya. Ngiwatholile amathuba ngangawasebenzisa ngendlela kodwa angizange ngililahle ithemba.
“Lokhu kunqoba kusemqoka kakhulu ngoba sinomdlalo weChampions League ngoMgqibelo. Kumele siqhubeke nokuwina.”
Kube yiChilli Boys emangaze iBucs kuqala ngembumbulu yegoli elishaywe u-Andile Jali ngomzuzu ka-22. USipho Chaine, ongunozinti wePirates, uvele wama, walibuka liyokhalakathela ekhoneni.
IChippa iqhubekile nokudlala kahle kwaze kwaba yenza iphutha lokuwisa uMonnapule Saleng ebhokisini. Usukumile uTshegofatso Mabasa wayibeka phakathi iphenathi ngomzuzu ka-45+4.
Isiwombe sesibili sithe ukwehla ngokomfutho womdlalo, kucaca ukuthi alikho iqembu ebelizimisele ngokudedela igoli.
Bese kubukeka sengathi umdlalo uzophela ngokulingana ngesikhathi uSaleng eshaya igoli lokunqona leBucs ngomzuzu ka-90+2. IChilli Boys ivele yalala uSaleng walingqofela phakathi kwaduma i-Orlando Stadium.
Emdlalweni olandelayo iPirates izobhekana neJwaneng Galaxy koweCaf Champions League ngempelasonto. Izoya kulo mdlalo ihamba phambili kulandela ukunqoba ngo 2-0 emlenzeni wokuqala.
IChippa yona izokwamukela iRichards Bay FC e buffalo Stadium.
Komunye umdlalo weligi iLamontville Golden Arrows inyukele esicongweni ngemuva kokushaya iStellenbosch FC ngo 2-0 e-Athlone Stadium. ISekhukhune United ishaye omakoti iMagesi ngo 1-0.
