Ibhola

OwoSuthu ucacisa ngabadlali abafisa ukubasayinisa

SIHLE NGUBO 

AmaZulu FC azozama ukuqinisa izindawo ezimbalwa ngaphambi kokuthi kuvalwe iwindi lokuhwebelana ngabadlali ngoLwesihlanu (uSepthemba 20).

Kulindeleke ukuthi kucace ngoLwesine ukuthi abadlali abangenawo bayawathola yini, nokuthi labo abafunwa amanye amaqembu bayawashiya yini lawo abakuwona.

Ngokusho kukaPhilani Ndlela, okhulumela Usuthu, iqembu linesifiso sokuthola abadlali abathile ngaphambi komnqamulajuqu wewindi.

“Abadlali esingathanda ukubathola ngaphambi kokuthi iwindi livalwe, umdlali ogijima enkabeni yenkundla (kunombolo 6) nomdlali oyi-wing back,” kucacisa uNdlela.

“Nokho ngeke kube yinkinga enkulu uma kuze kuvalwe iwindi singabatholanga. Kwezinye izindawo eqenjini kuqondile.”

Kuke kwavela ukuthi AmaZulu afuna uSamir Nurkovic osanda kuhlukana neTS Galaxy. Nokho uNdlela ukuphikile lokhu bake bakhuluma nalo mgadli waseSerbia.

“Simangele sonke sizwa intatheli isibuza lokho. Asikaze sikhulume noNurkovic,” kuzihlangula uNdlela.

Lo mgadli usemataniswa neSuperSport United okuvela ukuthi ifuna ukuvala isikhala esivuleke ngokulimala kukaBradley Grobler.

Ezinkundleni zokuxhumana abalandeli beChiefs abaningi bezwakalise ukuthi bangakujabulela ukubuya kukaKokota Piyano, njengoba ebizwa kanjalo, kuMakhosi.

IChiefs kubhekwe ukuthi izogcina imsayinisile yini u-Oswin Appollis wePolokwane City, osekunemibiko yokuthi imbanga nompetha beligi iMamelodi Sundowns. I-Orlando Pirates kuvela ukuthi ikhona nayo embangweni walo mdlali weBafana Bafana.

Umdlali wePirates uZakhele Lepasa kulindeleke ukuthi aphinde abolekiswe kwiSuperSport ngenxa yokusitholi isikimu kweZimnyama.