UMiguel usazomnyisa nesikimu uMsimango kwiChiefs
SIHLE NGUBO
Kubukeka kuzoba nzima kakhulu ukuthola isikimu kuGavin Msimango kwiKaizer Chiefs njengoba maphakathi emuva kugiya u-Inacio Miguel noRushin Dortley abashaya into ecokeme.
UMiguel, wase-Angola, ufike kwezwakala kuMakhosi futhi udonga lwawo lubukeka luqinile uma kuqhathaniswa nesizini edlule. Kukhona noCross kwesokunxele emuva kanti kwesokudla kugijima uReeve Frostler.
IChiefs ishaye AmaZulu FC ngo 3-1 emdlalweni weBetway Premiership eMoses Mabhida Stadium, ngoLwesithathu. Kulo mdlalo uMiguel ushaye igoli lesithathu waphinde waqokwa njengomdlali ovelele.
Nokho iChiefs kuzomele ingazithambisi njengoba yenzile esiwombeni sesibili ibhekene noSuthu nokwenze ukuthi idedele igoli ngomzuzu ka-47.
Emdlalweni olandelayo kuzoshuba kakhulu njengoba izokwamukela ompetha beligi iMamelodi Sundowns eFNB Stadium ngoMgqibelo. Egcina ukutholana la maqembu Abafana Ba’Style badedela isibhaxu sika 5-1 kuMakhosi.
Nakanjani uMiguel nozakwabo kumele bazame ukuvimba iSundowns ikakhulukazi emizuzwini engu-25 yokuqala. UGaston Sirino, oshaye igoli lesibili bebhekene noSuthu, uzobe ebhekene neSundowns okokuqala selokhu eshiye eChloorkop ekupheleni kwesizini edlule.
