Kugqame uMlaba amaProteas abesifazane emuhluza iWest Indies
SIHLE NGUBO
UNonkululeko Mlaba uthathe amawikhethi amane ngesikhathi iNingizimu Afrika ishaya iWest Indies ngamawikhethi ayishumi emdlalweni wokuqala weNdebe yoMhlaba yeT20 yabesifazane, eDubai Sports City Cricket Stadium, ngoLwesihlanu.
Le ntokazi yaseThekwini ibiyiphela endlebeni kwiWest Indies ebhethe kuqala kulo mdlalo.
INingizimu Afrika izibambe zanganyakaza izimbangi zagcina zenze ama-run angu-118.
Omunye umdlali wamaProteas odlale kahle uMarizanne Kapp othathe amawikhethi amabili.
Ngasohlangothini lweWest Indies kugqame uTaylor ohlanganise ama-run angu-44 engaphumanga.
Iphendula iNingizimu Afrika ukwenze kwaba lula ukuthola ama-run kuma-over okuqala. Bekubhoke ukaputeni u Laura Wolvaardt (59) noTazmin Brits (57) abavulile.
Ukuguqisa iWest Indies kuyinto enkulu eqenjini lakuleli njengoba iyona ebe ngompetha beNdebe yoMhlaba yeT20 ngo-2016.
Emdlalweni olandelayo iNingizimu Afrika inomqanda njengoba izobhekana ne-England ngoMsombuluko. Ngemuva kwalokho izobe isitholana neScotland.