EzakamuvaIbhola

Kuvela okuxoshise uMotsoeneng kwiNjampela FC

PHILI HLONGWANE 

INjampela FC seyihlukene nobengumqeqeshi wayo uTshepo Motsoeneng, okusale kancane ukuthi anyusele iqembu kwiMotsepe Foundation Championship.

UMotsoeneng usezakhele igama ngokuba ‘yindlondlo ye-ABC Motsepe League’ ngokunqoba iligi namaqembu akulesi sigaba, awase emidlalweni kazwelonke yokuhlungela ukukhuphukela kwiMotsepe Championship.

Ngesizini edlule lo mqeqeshi usanda kwenza adume ngazo ngokuhola ngempumelelo iqembu laKwaNongoma, iNjampela FC, lidla umhlanganiso kwiSafa KZN ABC Motsepe League. 

Ngo-Ephreli 28 iNjampela, ebidle ubhedu kuStream A weKZN Motsepe League, idlale  noMsinga United obudle ubhedu kuStream B.

Lona bekungumdlalo wamanqamu wokukhipha ompetha besifundazwe obudlalelwa kwaNgcedomhlophe Stadium, eMandeni, yanqoba iNjampela ngo 1-0. 

Emidlalweni yokuhlunga e-Upington, eNorthern Cape, ngoJuni iNjampela yehlulwe kweyandulela owamanqamu yiHighbury FC yase-Eastern Cape.

Lokhu kuqede amathemba okunyukela kwiMotsepe Foundation Championship kuMotsoenang neqembu lakhe.

Ngokomthombo osondelene neqembu usihlalo (isibongo sakhe okunguButhelezi) akathandanga ukuthi iqembu liwashiswe ijezi kwiNedbank Cup. Lishaywe yiMidlands ngo 1-0 kweyokuhlunga.

“INjampela ifisa ukumemezela ukuthi seyihlukene nomqeqeshi uTshepo Motsoeneng ngokushesha,” kusho isitatimende seqembu.

“Sifisa ukumbonga ngomsebenzi omuhle awenzele iqembu bese simfisele okuhle ukuya phambili.

“Iphini lomqeqeshi, uNkululeko Nzama, lizothatha izintambo njengomqeqeshi obambile. Iqembu lizoqhubeka nokuhlonipha imidlalo yeSafa nayo yonke imicimbi yayo.”