U-10111 ‘ubuyele ekhaya’ kuSuthu, babekelwe umbandela noKanu
SIHLE NGUBO
U-Arthur “10111” Zwane, osanda kujoyina AmaZulu FC njengomqeqeshi, akamusha ekutheni azihlanganise naleli qembu laseThekwini.
Le ngwazi, ebicija iKaizer Chiefs, ike yathi qu kuMaZulu ngesizini ka-1997-
/1998. Nokho uZwane kuvela ukuthi awukho umdlalo awudlala kuleli qembu.
Ngemuva kwalokho ube esejoyina iDynamos, asuke kuyona wayodlala kwiThembisa Classic ngesizini ka-1999/2000. IChiefs uyijoyine ngo-2000 kanti uhlale kuyona waze wagadla amakhokho emgibeni ngo-2010.
UZwane uzoqeqesha Usuthu ngokubambisana noVusumuzi “Kanu” Vilakazi, obecija iqembu leDStv Diski Challenge (DDC) kulona Usuthu.
Laba bathatha izintambo ngemuva kokukhonjwa indlela kukaPaplo “Cijimpi” Franco, waseSpain, oxakwe yimiphumela emidlalweni emithathu yokuqala yeBetway Premiership.
Okhulumela Usuthu, uPhilani Ndlela, uthe nakanjani laba baqeqeshi kunombandela ababekelwe wona eqenjini.
“Uma uthatha umsebenzi wokuqeqesha AmaZulu yinye into obekelwa yona – ukuqeda kwiTop 4 (ekupheleni kwesizini),” kusho uNdlela.
“Laba baqeqeshi bawubukile lo mbandela base benquma ukuthi yinto abangayenza, yikho besayinile.”
AmaZulu angelinye lamaqembu aqede ngaphandle kweTop 8 ngesizini edlule. Kuzocaca ukuthi uZwane noVilakazi bazokwazi yini ukushintsha lokho ekupheleni kwesizini.
UNdlela uveze ukuthi akubanga nenkinga ukuthola uZwane futhi ayikho eyokuthi Usuthu alutholani neChiefs.
“Ukube kunenkinga phakathi kwaMaZulu neChiefs ngabe uZwane akekho lapha,” kusho uNdlela.
“Ngabe uKaizer Motaung Senior akamnikanga izibusiso zakhe ukuthi eze lapha. Ngiyazi le nto idalwa yisimo sikaSiyethemba Sithebe…
“Nokho lokho kwakungathinti amaqembu womabili kodwa kwakuthinta yena umdlali uqobo.”
USithebe uye kwiChiefs engasadlaliswa kuMaZulu esolwa ngokusayina inkontileka yesibambiso naMakhosi engakangeni ezinyangeni eziyisithupha zokugcina zenkontileka yakhe.
UNdlela uthe ukufika kukaZwane kuMaZulu “kithina kufana nokubuyela ekhaya. Abanye abazi ukuthi ngisho uShaun Bartlett wake waludlalela Usuthu.”
Isivivinyo sokuqala sikaZwane noVilakazi kuzoba ukubhekana neStellenbosch FC emdlalweni weLast 16 yeCarling Knockout eqala ngempelasonto ka-Okthoba 19.
“Ukungatholakali kwemiphumela emihle emidlalweni emithathu yokuqala, akusho ukuthi iqembu belidlala kabi…
“Ingcindezi ikuyona iStellies njengoba kuyiyona evikela indebe (iCarling Knockout). Abafana bayazi ukuthi kumele babhukule bayolwa.”
