Ulahlwe yicala lokushaya intombi uThembinkosi Lorch wePirates

By Sbongs Gumbi

UThembinkosi Lorch utholwe enecala lokushaya ngenhloso yokulimaza yinkantolo kaMantshi waseRandburg, eGoli ngoLwesibili. 

Lo mdlali we-Orlando Pirates waboshwa eMidrand la kwenzeka khona lesi sehlakalo ngoSepthemba ka-2020, wadedelwa ngebheyili ka-R2 000. 

Lokhu kwakulandela ukuthi eshaye uFundiswa Nokuphiwa Mathithibala owayevakashele uThembinkosi Lorch ngaleso sikhathi. 

“UFundiswa Nokuphiwa Mathithibala uthe wayevakashele uLorch ngesikhathi emshiya endlini yakhe, wazikhipha nabangani bakhe. 

“Ngokubona kuhlwa engabuyile, wabe esemthumelela umlayezo ethi akabuyise izikhiye zemoto yakhe,” usho kanje okhulumela uphiko lokushushiswa kwamacala kuleli, uPhindi Mjonondwane.

“Kuthe uma efika (uThembinkosi Lorch), kwasuka ingxabano nokuyila uLorch abe esesebenzisa amandla. 

“Wambamba wazama ukumklinya, elokhu emhudula. Wakwazi ukuphunyuka wafonela abangani ecela ukusizwa.” 

Umshushisi wenkantolo, uMichele Hart ukubeke phambi kwenkantolo ukuthi ubufakazi bodokotela buyavumelana nalezi zinsolo. 

“Umsolwa akazange alimale ndawo okusho ukuthi nguye owashaya ummangali. Umsolwa nofakazi bakhe abazange babe ngofakazi abathembekile enkantolo,” kuchaza uMjonondwane. 

FUNDA NALA: IRichards Bay ibuyisa umqeqeshi ozakhele igama kwiPirates

Isigwebo sesiyokhishwa ngoJulayi 28 okuwusuku icala elihlehliselwe kulo. IPirates ibingakasho lutho ngalolu daba.