Obecija iChiefs umenyezelwe njengomqeqeshi woSuthu
SIHLE NGUBO
Oke wacija iKaizer Chiefs kumasizini edlule, u-Arthur “10111” Zwane, usemenyezelwe njengomqeqeshi omusha waMaZulu FC.
Lokhu kuqinisekiswe isitatimende esikhishwe Usuthu sekuyolalwa ngoLwesibili ebusuku.
Ngokwalesi sitatimende uZwane uzosebenza ngokubambisana noVusumuzi “Kanu” Vilakazi ekubeni abaqeqeshi beqembu elikhulu. UVilakazi ubeqeqesha iqembu leDStv Diski Challenge kuwona AmaZulu.
UZwane ubehola iChiefs ngesizini ka-2022/2023 njengomqeqeshi. Nokho akuhambanga kahle kuMakhosi kwase kufakwa uMolefi Ntseki esikhaleni sakhe ekuqaleni kwesizini ka-2023/2024.
Ube esenikwa isikhundla sokuba yinhloko yenkulisa kwiChiefs uZwane ngesikhathi kuba nezinguquko kufika umqeqeshi uNasreddine Nabi eNaturena.
Usuthu lusanda kuhlukana nobengumqeqeshi uPablo “Cijimpi” Franco waseSpain ngenxa yokungayitholi imiphumela emihle selokhu kuqale isizini.
Leli qembu liqale lashaywa yiPolokwane City ngo 2-1 emdlalweni wokuqala. Kowesibili kuthe ukwenyukela njengoba lishaywe yiKaizer Chiefs ngo 3-1.
Bekunethemba lokuthi Usuthu luzovuka ngeMarumo Gallants nayo ebingakanqobi kodwa lwashaywa ngo 1-0. Yilapho ke ekhonjwe eza ngayo uFranco.
“Inhlanganisela yamava okusebenza njengabaqeshi nokuba abadlali bebhola bakudala, izobaluleka kakhulu ekuholeni abadlali bethu abasebancane nalabo asebeqinile ukuya phambili kule sizini,” kusho umengameli weqembu uSandile Zungu esitatimendeni.
Usuthu luzobuyela emidlalweni yeBetway Premiership ngokubhekana ne-Orlando Pirates, engompetha abasha beMTN8, ngo-Okthoba 25.