‘Amajongo amabili’ oSuthu azovivinywa okokuqala kwiCarling Knockout
SIHLE NGUBO
Abaqeqeshi ababili abasanda kuqashwa AmaZulu FC, uVusumuzi “Kanu” Vilakazi no-Arthur “10111” Zwane, yibona abazovivinywa kuqala emidlalweni yeCarling Knockout ka-2024.
Lokhu kuhlaluke ngesikhathi iPremier Soccer League (PSL) imemezela izinkundla nezinsuku okuzodlalwa ngazo iCarling Knockout, eyethulwe ngokusemthethweni ngoLwesibili.
Imidlalo yeLast 16 yalo mqhudelwano izodlalwa ngempelasonto ka-Okthoba 18 kuya ku-20. Amathikithi azodayiswa eTicketPro ezweni lonke.
Usuthu luzokwamukela abavikela indebe, iStellenbosch FC, eKing Zwelithini Stadium, eMlaza, ngoLwesihlanu, ngo-Okthoba 8. Umdlalo uyoqala ngo-7 ebusuku.
UVilakazi, obeqeqesha iqembu leDStv Diski Challenge laMaZulu, noZwane, obeyinhloko yabaqeqeshi kwinkulisa yeKaizer Chiefs, baqeqesha Usuthu ngokubambisana, kanti lona kuzobe kungumdlalo wabo wokuqala selokhu beqashiwe.
AmaZulu abesahlulekile ukunqoba emidlalweni emithathu yeBetway Premiership lapho ethole induku kuyona yonke. Nakanjani leli qembu laseThekwini lizofuna ukubuyisa isithunzi ngokuwashisa ijezi ompetha beCarling Knockout banyakenye.
Ngo-Okthoba 19 kuzobhekwa imidlalo emibili yamaqembu athathwa njengamakhulu kwiligi yaseNingizimu Afrika.
I-Orlando Pirates izokwamukela omakoti bePremiership iMagesi FC, e-Orlando Stadium, ngo-3 ntambama, kanti iMamelodi Sundowns izobhekana neLamontville Golden Arrows, eLucas Moripe Stadium, ngo-6 ntambama.
Umdlalo ozobhekwa ngabomvu ngeSonto (Okthoba 20) ophakathi kweSuperSport United neKaizer Chiefs eNew Peter Mokaba Stadium, ngo-3 ntambama.
La maqembu azophinde atholane phezulu emdlalweni weBetway Premiership, eFree State Stadium, ngo-Okthoba 26.
Imidlalo yeCarling Knockout Last 16:
Ngo-Okthoba 18: AmaZulu v Stellenbosch FC, King Zwelithini Stadium, 7pm
Ngo-Okthoba 19: Orlando Pirates v Magesi FC, Orlando Stadium, 3pm; Cape Town City v Royal AM, Atholane Stadium, 3pm; Mamelodi Sundowns v Lamontville Golden Arrows, Lucas Moripe Stadium, 6pm; Polokwane City v Marumo Gallants, Old Peter Mokaba Stadium, 8pm
Ngo-Okthoba 20: TS Galaxy v Chippa United, Mbombela Stadium, 3pm; SuperSport United v Kaizer Chiefs, New Peter Mokaba Stadium, 3pm; Richards Bay FC v Sekhukhune United, King Zwelithini Stadium, 5.30pm