IBafana Bafana

UMshishi ethubeni lokubalwa nabakhethekile beBafana Bafana

Umdlali wasesiswini weBafana Bafana, uThemba Zwane, uzojoyina abadlali asebefinyelele endaweni ekhethekile eqenjini lesizwe laseNingizimu Afrika, uma ezodlala sebebhekene neCongo Brazzaville emdlalweni we-Africa Cup of Nations (Afcon) eNelson Mandela Stadium, ngoLwesihlanu ngo-7 ebusuku.

UMshishi, njengoba aziwa ebholeni, uzobe esedlala umdlalo wakhe ka-50 uma ezongena kulo mdlalo. UZwane, ukaputeni uRonwen Williams (46 wemidlalo) noPercy Tau (naye ona-46 wemidlalo), yibona abadlali abanamava kuleli qembu elizama ukuzibekisela indawo kwi-Afcon eseMorocco ngonyaka ozayo.

Lo mdlali, ongowokuzalwa eTembisa, uqale ukudlalela iqembu lesizwe ngo-2014 ngesikhathi iBafana ibhekene ne-Australia emdlalweni wobungani owaphela ngo 1-1. Wasuka ebhentshini egqoke unombolo 8 wangena endaweni ka-Ayanda Patosi, e-ANZ Stadium, eSydney, e-Australia.

Kusukela lapho usedlale imidlalo engu-49 okuyimizuzu engu-3479, washaya amagoli angu-12. Igoli lakhe lokuqala leBafana walishaya bebhekene neBurkina Faso kowokuhlungela iNdebe yoMhlaba abawunqoba ngo 3-1 eFNB Stadium, ngo-Okthoba 7, wango-2017.

Lo mdlali, oneminyaka engu-35, uthathwa njengomunye wabasesiswini abasezingeni eliphezulu, kanti umqeqeshi weBafana uHugo Broos ulokhu eqhubeke njalo nokumncoma.