AmaProteas asebeke unyawo olulodwa kweyandulela owamanqamu kweyoMhlaba
SIHLE NGUBO
INingizimu Afrika izibeke ethubeni lokudlulela kweyandulela owamanqamu kwiNdebe yoMhlaba yeT20 yabesifazane, kulandela ukushaya iBangladesh ngamawikhethi ayisikhombisa eDubai Sports City Cricket Stadium, ngoMgqibelo.
IBangladesh iyona ewine ithosi yakhetha ukubhetha. Leli qembu belivele lingasenalo ithuba lokudlulela phambili njengoba liye kulo mdlalo wokugcina linamaphuzu amabili.
Ngasohlangothini lweNingizimu Afrika bekumele nakanjani inqobe lo mdlalo ukuze izibeke ethubeni lokudlulela kweyandulela owamanqamu.
AmaProteas ashwibe kahle kakhulu kuma-over okuqala engayivumeli iBangladesh ukuthi ishaye ama-run kalula.
Abadlali beBangladesh abadlale kahle uSobhana Mostary, okhishwe uNonkululeko Mlaba ena-38, noJoty ohlanganise ama-run angu-32.
UMlaba ubesethatha iwikhethi yesishiyagalolunye kule Ndebe yoMhlaba yeT20 yabesifazane, kanti uyena ozihola phambili.
IBangladesh igcine ikwaze ukuhlanganisa ama-run angu-106 kuma-over angu-20. Lokhu bekunika iNingizimu Afrika ithuba elikahle lokunqoba ngamalengiso ukuze yenyuse i-run rate.
Iphendula iNingizimu Afrika isheshe yalahlekelwa ukaputeni uLaura Wolvaardt esenama-run ayisikhombisa kuphela. Nokho uTazmin Brits (42) usale wancenga elekelelwa u-Annekke Bosch ophume esena-25.
Ukunqoba kweNingizimu Afrika kuyibuyisela esicongweni selogi kuGroup B ngamaphuzu ayisithupha. Isizolinda umdlalo ophakathi kwe-England neWest Indies okuyiwona ozocacisa ukuthi yimaphi amaqembu amabili azodlalule kweyandulela owamanqamu.
