IBucs isule izinyembezi zabalandeli ishaya iSuperSport

SIHLE NGUBO 

I-Orlando Pirates isule izinyembezi zabalandeli bayo ngokushaya iSuperSport United ngo 2-0 emdlalweni weBetway Premiership, e-Orlando Stadium, ngoLwesibili ebusuku.

IBucs ishiye abalandeli bayo bephoxekile ngemuva kokushaywa yiMagesi FC ngo 3-2 emdlalweni weCarling Knockout Last 16, enkundleni efanayo.

Nokho ngoLwesibili ayilenzanga iphutha lokudembesela (okubonakale ibhekene neMagesi) yaqoqa amaphuzu aphelele kuMatsatsantsa a Pitori.

Kube amagoli ka-Evidence Makgopa, ngesiwombe sokuqala, nelikaDeon Hotto, ngesesibili, aweze eZimnyama kulo mdlalo.

ISuperSport ibisishaywa okwesibili kulandelana yiqembu laseSoweto ezinsukwini ezine. Ngempelasonto ibhaxabulwe yiKaizer Chiefs ngo 4-0 emdlalweni weCarling Knockout.

Bese kungokwesibili iSuperSport ishaywa yiPirates selokhu kuqale isizini. IBucs iyishaye ngo 3-1 emdlalweni we-quarterfinal yeMTN8.

ISuperSport izobhekana neChiefs emdlalweni weBetway Premiership ngempelasonto, kanti iBucs izotholana phezulu naMaZulu FC.

Ukuwina kweBucs kuyinyusele esicongweni ngamaphuzu angu-12 njengoba seyinqobe yonke imidlalo emine yeligi.