IBetway Premiership

Ngabe iSuperSport ingawudedela ugesi weMagesi kwiBucs?

SIHLE NGUBO

 ISuperSport United izozithola ibhekana neqembu laseSoweto okwesibili ezinsukwini ezine kulandelana.

Leli qembu lasePitoli lizotholana phezulu ne-Orlando Pirates emdlalweni weBetway Premiership, e-Orlando Stadium, ngoLwesibili ngo-7.30 ebusuku.

Amatsatsantsa a Pitori abebhekene neKaizer Chiefs kwiCarling Knockout Last 16, ePeter Mokaba Stadium, ngoMgqibelo. Kulo mdlalo ezikaGavin Hunt zishaywe ngo 4-0.

ISuperSport ivule isizini ngokushaywa ompetha beligi, iMamelodi Sundowns ngo 2-0. Lokhu kuchaza ukuthi ezikaHunt sezibhekane namaqembu athathwa njengamakhulu kwiligi yaseNingizimu Afrika kathathu kule sizini esanda kuqala.

Akukapheli ukuqwala intaba kwiSuperSport njengoba ngempelasonto izophinde ibhekane neChiefs emdlalweni weBetway Premiership. Lo mdlalo ubhekiwe ukuthi uzohamba kanjani ngemuva kokubhaxabulwa kweSuperSport ngempelasonto.

Emidlalweni emine yeligi esidlalwe yiSuperSport isanqobe owodwa, yadlala ngokulingana owodwa, yase ishaywa kwemibili. Nakanjani izozama ukubuya nokuthile e-Orlando Stadium njengoba kucaca ukuthi isizini uyiqale ngebatha.

Ngasohlangothini lweBucs iya kulo mdlalo ihambela phezulu kulandela ukunqoba imidlalo emithathu yokuqala yeBetway Premiership. IPirates ingelinye lamaqembu angakashaywa emidlalweni yeligi selokhu kuqale isizini.

Nokho iSuperSport ingase uzame ukusebenzisa ukuthi iBucs iwashiswe ijezi omakoti bePremiership iMagesi FC, eyishaye ngo 3-2 kwiCarling Knockout Last 16 ngempelasonto edlule.