Ukukhishwa kweRoyal AM kwiNSL kukhahlelele iChiefs ngaphandle kweTop 8
SIHLE NGUBO
Ubulungu beRoyal AM kwiNational Soccer League (NSL) buphele nya kulandela ukuthi amaqembu evotile emhlanganweni ngoLwesine.
Abebemele wonke amaqembu angu-31 eBetway Premiership naweNational First Division (NFD) bahlanganile ukuzovota ngalolu daba.
Lokhu kuchaza ukuthi wonke amaphuzu atholakale kudlalwa neRoyal AM athathwa njengento engekho.
Lokhu kushintshe izinto kwilogi yePremieship njengoba amaqembu ayenqobile ebhekene neThwihli Thwahla ethathelwe amaphuzu.
IKaizer Chiefs ebisizabalaze yahlanganisa amaphuzu angu-30, ithathelwe iphuzu elilodwa eyalithola ibambana ngo 2-2 neRoyal AM. Lokhu kuyenze yaphuma kwiTop 8.
Namanye amaqembu ayenqobile ebhekene neRoyal AM anyakazisekile kwilogi yePremieship kumbandakanya neMamelodi Sundowns ezihola phambili.
Iqembu elizoqeda endaweni ka-15 lizodlala imidlalo yokuhlunga namabili azoqeda endaweni yesibili neyesithathu kwiMotsepe Foundation Championship.
Kwenzeka konke lokhu uShauwn Mkhize ubese-Eswatini ngeSonto lapho kuputshuke izindaba zokuthi ufuna ukuthenga iMoneni Pirates.
Kuvela ukuthi uke wakhuluma neSwaziland News lapho eqhube lokho ajwayeleke ngakho, ukukhuluma ngokuzigqaja.
“Bengingeke ngibe lapha ukube akukho okuthile engikufunayo,” ucashunwe yiSwaziland News esho kanje.
IRoyal AM ikweleta iSARS u-R40 million okuyinto eyenze ukuthi ibingakwazi ukudlala imidlalo yeligi eyagcina ukuyidlala ngoDisemba.
I-SARS isayifuna imali yayo kuMkhize nokuchaza izinto ezifana nomuzi wakhe aziphephile neze.
