IPirates ibheke ukugcina irekhodi layo uma isitholana neRockets
SIHLE NGUBO
I-Orlando Pirates izozama ukugcina irekhodi layo lokungashaywa selokhu kuqale isizini uma seyivakashela iTS Galaxy emdlalweni weBetway Premiership, eMbombela Stadium, ngoLwesibili ngo-7.30 ebusuku.
IBucs iyona yodwa engakashaywa emidlalweni yeligi selokhu kuqale isizini entsha. Emidlalweni emihlanu eyidlalile iyinqobe yonke, okwenza ukuthi izihole phambili ngamaphuzu angu-15.
Ompetha beligi, iMamelodi Sundowns, bashaywe yiPolokwane City ngo 1-0 emdlalweni wePremiership ngeSonto. Lokhu kunike iPirates ithuba lokuqhubeka nokuhlala esicongweni ngokukhululeka.
Ngasohlangothini lweRockets ayiyiqalanga neze kahle imidlalo yeligi. Leli qembu lingelinye lamabili asahlulekile ukuthola amaphuzu amathathu emdlalweni. Elinye iqembu okuqhuma isibhaxu kulona AmaZulu FC ayivale emsileni.
I-TS Galaxy seyidlale imidlalo emine yadlala ngokulingana owodwa yase ishaywa kwemithathu. Usuthu lona lusashaywe kuyona yonke imidlalo emine.
AmaZulu azokwamukela iChippa United emdlalweni weBetway Premiership eMoses Mabhida Stadium, eThekwini, ngoLwesibili ngo-7.30 ebusuku.
IChilli Boys seyidlale imidlalo eyisithupha, yanqoba emithathu yashaywa emibili, kwathi kowodwa yashaywa. Lokhu kuyenza ihlale endaweni yesithathu kwilogi yePremieship.
Komunye umdlalo weligi ngoLwesibili kuzotholana phezulu iSekhukhune United neRichards Bay FC ePeter Mokaba Stadium ngoLwesibili ebusuku.