IChippa idube ebizoyidlala neChiefs, i-Arrows neDowns
IChippa United seyikhethe ukuhoxa ekudlaleni kwiHome of the Legends Cup okuhlelwe ukuthi idlalwe ngoNovemba 16, eNelson Mandela Bay Stadium, eGqeberha.
IChilli Boys ikhiphe isitatimende lapho uzwakalise ukungenami khona ngendlela ephathwe ngayo njengoba kuhlelwa le midlalo.
Endaweni yeChippa sekuzongena iCape Town City FC. Amanye amaqembu akhona kulo mqhudelwano yiKaizer Chiefs, iMamelodi Sundowns neLamontville Golden Arrows.
“Sidumele ngendlela yokufihlwa kwezinto mayelana nalo mqhudelwano,” kusho isitatimende esithunyelwe yiChippa
“Yize besivulelekile ukuba yingxenye uma kubhekwa amaqembu azobe ekhona kodwa isikhulu esiphezulu u-Anele Qaba sikhombise ukuba manqika ekuxoxisaneni kahle nathi.”
Emdlalweni wokuqala kuzobhekana iChiefs ne-Arrows ngo-10. Kowesibili kuzotholana phezulu iCape Town City neSundowns ngo-1 emini. Umdlalo wamanqa uzokuba ngo-5 ntambama.
“Enye yezinto ezingasiphathi kahle ukungalingani esikhonjiswe kona ngesikhathi kukhishwa imali nezinsiza kusebenza kulo mcimbi,” kuqhuba isitatimende.
“Amanye amaqembu amathathu anikwe into egculisayo ukuthi abe yingxenye yomqhudelwano kodwa iChippa United yanganikwa okufanayo.
“Imizamo yethu yokubhekana nalesi simo ishaywe indiva uQaba, wasitshela ukuthi singahoxa uma singaneme ngemigomo. Sesinqume ukuhoxa kulo mqhudelwano.”
Ithikithi losuku lonke kulo mqhudelwano libiza u-R199 kanti liyatholakala enkundleni iNelson Mandela Bay. Ngempelasonto kaNovemba 16 kuzobe kudlala imidlalo esekhalendeni leFifa ngakho uzobe imile imidlalo yeligi.
